Savings Account: సేవింగ్స్ అకౌంట్లపై వడ్డీ రేట్ల పెంపు.. బ్యాంక్ గుడ్‌న్యూస్.. అకౌంట్‌లో డబ్బులుంటే చాలు!

Savings Account: సేవింగ్స్ అకౌంట్లు, ఫిక్స్‌డ్ డిపాజిట్లపై వడ్డీ రేట్లను పెంచింది డీసీబీ బ్యాంక్ (DCB Bank). రూ. 2 కోట్లు లోబడిన డిపాజిట్లపై ఇది వర్తిస్తుంది. డీసీబీ బ్యాంక్ అధికారిక వెబ్‌సైట్ ప్రకారం.. ప్రస్తుతం డీసీబీ బ్యాంక్ సేవింగ్స్ అకౌంట్ హోల్డర్లు గరిష్టంగా 8 శాతం వరకు వడ్డీ పొందుతారు. ఇక ఫిక్స్‌డ్ డిపాజిట్ల విషయానికి వస్తే సాధారణ ప్రజలు గరిష్టంగా 8 శాతం వరకు, అదే సీనియర్ సిటిజెన్లు అయితే గరిష్టంగా 8.50 శాతం వరకు వడ్డీ అందుకుంటారు. డీసీబీ బ్యాంక్ వెబ్‌సైట్ ప్రకారం చూస్తే.. పెంచిన వడ్డీ రేట్లు మే 8 నుంచే అమల్లోకి వచ్చాయని తెలుస్తోంది. ఇక సేవింగ్స్ అకౌంట్‌లో ఎంత నగదు ఉంటే వడ్డీ ఎలా ఉంటుంది, FD లకు సంబంధించి ఎంత డిపాజిట్లపై ఎంత కాలపరిమితులపై ఎంత వడ్డీ రేట్లు ఉన్నాయో ఇప్పుడు చూద్దాం.

సేవింగ్స్ అకౌంట్‌లో రూ. లక్ష వరకు బ్యాలెన్స్ ఉంటే గనుక 2 శాతం వడ్డీ అమల్లో ఉంది. రూ. లక్ష నుంచి రూ.2 లక్షల వరకు నగదు ఉంటే గనుక 3.75 శాతం వడ్డీ అందుతుంది. ఇక రూ.2 లక్షల నుంచి రూ. 5 లక్షల వరకు బ్యాలెన్స్ మెయింటెయిన్ చేస్తే 5.25 శాతం వడ్డీ వస్తుంది.

• బ్యాంక్ అకౌంట్ క్లోజ్ చేయాలా? ఒక్కసారి వీటి గురించి తెలుసుకోండి.. లేదంటే చిక్కులు!

అదే విధంగా బ్యాంక్ సేవింగ్స్ ఖాతాలో రూ. 5 లక్షల నుంచి రూ.10 లక్షల వరకు నగదు ఉంటే గనుక 6.25 శాతం వరకు వడ్డీ లభిస్తుంది. రూ.10 నుంచి రూ.50 లక్షల వరకు నగదు మెయింటెయిన్ చేస్తే 7 శాతం వడ్డీ, రూ.50 లక్షల నుంచి రూ.2 కోట్ల వరకు బ్యాలెన్స్ ఉంటే 7.25 శాతం వడ్డీ వస్తుంది. గరిష్టంగా రూ. 10 కోట్ల నుంచి రూ.200 కోట్ల మధ్య బ్యాలెన్స్ ఉంటే వారికి గరిష్టంగా 8 శాతం వరకు వడ్డీ అందుతుంది.

ఇక ఫిక్స్‌డ్ డిపాజిట్ల సంగతికొస్తే 7 నుంచి 45 రోజుల్లో ముగిసిపోయే ఫిక్స్‌డ్ డిపాజిట్లపై ప్రస్తుతం 3.75 శాతం వడ్డీ అమల్లో ఉంది. 46-90 రోజుల ఎఫ్‌డీపై డీసీబీ బ్యాంక్ 4 శాతం వడ్డీ ఆఫర్ చేస్తోంది. 91 రోజుల నుంచి 6 నెలల వ్యవధి ఉండే ఎఫ్‌డీపై 4.75 శాతం, 6 నుంచి 12 నెలల వ్యవధి ఉన్న డిపాజిట్లపై 6.25 శాతం వడ్డీ అమల్లో ఉంది. 700 రోజుల నుంచి 36 నెలల వ్యవధి ఉండే ఫిక్స్‌డ్ డిపాజిట్లపై అత్యధికంగా 8 శాతం వడ్డీ ఆఫర్ చేస్తోంది డీసీబీ బ్యాంక్. సీనియర్ సిటిజెన్లకు అత్యధికంగా ఇక్కడ 8.50 శాతం వడ్డీ వస్తుంది.

• ట్విట్టర్‌‌కు కొత్త సీఈఓగా మహిళ.. ఆమె ఎవరో మీకు తెలుసా? గత నెలలోనే మస్క్‌తో..

పోస్టాఫీస్ పొదుపు పథకాలన్నీ ఇవే.. వడ్డీ రేట్లు ఎలా.. ఎంత డిపాజిట్ చేయాలి.. లాభాలెలా?

• Read Latest Business News and Telugu News