దేనా బ్యాంక్ 20 శాతం ఢమాల్...

దేనా బ్యాంక్ షేరు ధర జనవరి 3 మార్నింగ్ సెషన్‌లో ఒకానొక సమయంలో 20 శాతానికి పైగా పతనమైంది. అదే సమయంలో బ్యాంక్ ఆఫ్ బరోడా షేరు 2.5 శాతం మేర పెరిగింది. అలాగే విజయా బ్యాంక్ దాదాపు 7 శాతం మేర తగ్గింది.
కేంద్ర క్యాబినెట్ జనవరి 2న మూడు ప్రభుత్వ రంగ బ్యాంకులైన బ్యాంక్ ఆఫ్ బరోడా, విజయా బ్యాంక్, దేనా బ్యాంక్ విలీనానికి ఆమోదం తెలిపిన విషయం తెలిసిందే.
కాగా మూడు బ్యాంకులు షేర్‌హోల్డర్లకు సంబంధించి ఈక్విటీ షేర్ ఎక్స్చేంజ్ రేషియో ప్రతిపాదనకు ఆమోదం తెలిపాయి. దీని ప్రకారం.. దేనా బ్యాంక్ వాటాదారులు 1,000 షేర్లకు గానూ రూ.2 ముఖ విలువ కలిగిన 110 బ్యాంక్ ఆఫ్ బరోడా షేర్లను పొందొచ్చు. ఇక విజయా బ్యాంక్ వాటాదారులకు ప్రతి 1,000 షేర్లకు గానూ 402 బ్యాంక్ ఆఫ్ బరోడా షేర్లు లభిస్తాయి.
గురువారం మధ్యాహ్నం 12:05 సమయంలో దేనా బ్యాంక్ షేరు ధర 18 శాతానికి పైగా క్షీణతతో రూ.14.65 వద్ద ట్రేడవుతోంది. ఈ షేరు ఒకానొక సమయంలో దాదాపు 20 శాతం మేర పడిపోయింది. అదే సమయంలో బ్యాంక్ ఆఫ్ బరోడా షేరు 1 శాతానికి పైగా లాభంతో 120.7 వద్ద ఉంది. ఇక విజయా బ్యాంక్ షేరు 6 శాతానికి పైగా నష్టంతో రూ.47.9 వద్ద కదలాడుతోంది.