దివీస్ ల్యాబ్స్‌కు అమెరికా షాక్.. భారీగా షేర్ల పతనం

విశాఖపట్నంలోని యూనిట్-2లో దివీస్ ల్యాబొరేటరీస్‌ ఉత్పత్తి చేస్తున్న ఔషధాల దిగుమతులపై యూఎస్ ఫుడ్ అండ్ డ్రగ్స్ అడ్మినిస్ట్రేషన్ హెచ్చరికలు జారీ చేసింది. దీంతో స్టాక్ మార్కెట్లో ఆ సంస్థ షేర్లు భారీగా కుదుపులకు లోనయ్యాయి. ఔషధ ఎగుమతులపై అమెరికా డ్రగ్ ఏజెన్సీ 66-40 హెచ్చరికల ప్రభావం పడనుండటంతో... దివీస్ షేర్ల ధరలు 20 శాతం పతనమయ్యాయి. లెవిటిరాసెటమ్, నాప్రోక్సెన్ సోడియం, క్లోరోఫ్యురైన్ తదితర పది రకాల ఔషధాలకు యూఎస్ ఫుడ్ అండ్ డ్రగ్స్ అడ్మినిస్ట్రేషన్ మినహాయింపు ఇచ్చిందని దివీస్ ల్యాబొరేటరీస్ బాంబే స్టాక్ ఎక్స్ఛేంజీకి తెలిపింది.

యూఎస్ ఫుడ్ అండ్ డ్రగ్స్ అడ్మినిస్ట్రేషన్‌ అభ్యంతరాల నేపథ్యంలో తిరిగి ఎఫ్‌డీఏ సమ్మతి పొందడం కోసం థర్డ్ పార్టీ కన్సల్టెన్సీలతో కలిసి దివీస్ ప్రయత్నాలు ప్రారంభించింది. యూఎస్ఎఫ్‌డీఏ ఆంక్షల ప్రభావం నేపథ్యంలో దివీస్ షేర్లు 19.69 శాతం నష్టపోవడంతోపాటు ఏడాది కనిష్ట స్థాయికి చేరుకున్నాయి. బాంబే స్టాక్ ఎక్స్ఛేంజీలో ఆ సంస్థ షేర్ల విలువ రూ. 635కు చేరింది. ఆ సంస్థ అమ్మకాల్లో 60-65 శాతం, అమెరికాకు ఎగుమతి అవుతున్న ఔషధాల్లో 20 శాతానికిపైగా వాటా ఈ ప్లాంట్‌‌దే. దీంతో ఎఫ్‌డీఏ హెచ్చరికల ప్రభావం దివీస్‌పై తీవ్రంగా పడింది.

గతంలోనూ ఎఫ్‌డీఏ ఐదు లోపాలకు సంబంధించి దివీస్ ల్యాబ్స్‌కు 483 అబ్జర్వేషన్స్ జారీ చేసింది. స్టాక్‌ బ్రోకింగ్‌ సంస్థ ఎమ్కే గ్లోబల్‌ రూపొందించిన ఒక నివేదికలో దివీస్‌పై పలు అంశాలను ప్రస్తావించింది. దివీస్‌ వైజాగ్‌ ప్లాంటుపై యూఎస్ఎఫ్‌డీఏ వివిధ లోపాలు (అబ్జర్వేషన్స్‌) నమోదు చేసిందని పేర్కొంది. యాక్టివ్‌ ఫార్మా ఇన్‌గ్రెడియంట్స్‌ తయారీలో స్వచ్ఛత, నాణ్యత, పటిష్టత వంటి అంశాలకు ప్రాధాన్యం ఇవ్వడం లేదని తెలిపింది. ఉత్పత్తిలో లోపాలు కనిపిస్తున్నాయని పేర్కొంది. ఔషధాల నాణ్యతకు సంబంధించిన డేటా అనలిటిక్స్‌ అంశాల్లోనూ తగిన నియంత్రణలు పాటించడం లేదని రిపోర్ట్ ఇచ్చింది. దీంతో గతేడాది డిసెంబర్లోనూ ఆ సంస్థ షేర్ల ధర భారీగా పతనమైంది.