భారతీయ విమానయాన సంస్థకు ట్రంప్ కృతజ్ఞతలు!

అమెరికా బహుళజాతి విమానాల తయారీ సంస్థ బోయింగ్‌‌తో ఇండియాకు చెందిన స్పైస్‌జెట్ వ్యాపార ఒప్పందం కుదుర్చుకున్నందుకు డొనాల్డ్ ట్రంప్ సోమవారం ​కృతజ్ఞతలు తెలిపారు. బోయింగ్ సంస్థ నుంచి 22 బిలియన్ డాలర్లతో 205 విమానాల కొనుగోలుకు స్పైస్‌జెట్ ఒప్పంద చేసుకోవడం వల్ల తమ దేశంలోని వేలాది మందికి ఉపాధి లభిస్తుందని ట్రంప్ వెల్లడించారు. అమెరికా అధ్యక్షుడిగా ట్రంప్ బాధ్యతలు చేపట్టిన తర్వాత తొలిసారిగా పర్యటించిన ప్రధాని నరేంద్ర మోడీ ఆయనతో వైట్‌హౌస్‌‌లో సమావేశమయ్యారు.

సోమవారం ప్రధాని నరేంద్ర మోడీకి అధ్యక్ష భవనంలో ఏర్పాటుచేసిన విందులో ట్రంప్, ఆయన సతీమణి మెలానియా ట్రంప్ కూడా పాల్గొన్నారు. స్పైస్‌జెట్ ఒప్పందం వల్ల 1,32,000 మంది నైపుణ్యం గల అభ్యర్థులకు ఉద్యోగాలు సృష్టించే అవకాశం ఉందని అమెరికా వాణిజ్య విభాగం తెలిపింది. ఈ ఒప్పందంపై స్పైస్‌జెట్ ఛైర్మన్, మేనేజింగ్ డైరెక్టర్ అజయ్ సింగ్ స్పందించారు. దీనికి సంబంధించిన నిధుల సమీకరణ ప్రక్రియ ప్రారంభమైందని..... విక్రయం, లీజుబ్యాక్ మెకానిజం ద్వారా ఇప్పటికే గణనీయమైన సంఖ్యలో నిధులు సేకరించామని, అంతే కాదు అనేక ఆఫర్లు కూడా ఉన్నాయని ఆయన తెలిపారు.

గతేడాది ఇండియాలో ఏవియేషన్ మార్కెట్ ప్రపంచంలోనే అత్యంత వేగంగా అభివృద్ధి చెందితే, ఇందులో చైనా అగ్రస్థానంలో ఉంది. అంతర్జాతీయ ఎయిర్ ట్రాన్స్‌పోర్ట్ అసోసియేషన్ నివేదిక ప్రకారం గత మార్చి నాటికి చైనా దేశీయ విమాన మార్కెట్ 15.1 శాతం వృద్ధి సాధిస్తే, భారత్ 14.6 శాతం నమోదు చేసింది. ఇండియాలో విమానయాన రంగానికి మరింత డిమాండ్ ఉంటుందని బోయింగ్ లాంటి సంస్థలు భావిస్తున్నాయి. రెండేళ్ల కింద తీవ్ర నష్టాల్లో కూరుకుపోయి మూతబడటానికి సిద్ధంగా ఉన్న స్పైస్‌జెట్ బాధ్యతలను అజయ్ సింగ్ 2015లో స్వీకరించి సంస్థను లాభాల బాట పట్టించారు.