ప్రవర్తన సరిగా లేదు.. ఫ్లిప్‌కార్ట్ సీఈవో బిన్నీ రాజీనామా

వ్యక్తిగత ప్రవర్తన సరిగా లేదనే ఆరోపణలపై ఫ్లిప్‌కార్ట్‌ సీఈవో బిన్నీ బన్సాల్ ఆ పదవి నుంచి తప్పుకున్నారు. ఆయన రాజీనామాను వాల్‌మార్ట్ వెంటనే ఆమోదించింది. 6 నెలల కిందటే ఫ్లిప్‌కార్ట్‌లో మెజార్టీ వాటాను వాల్‌మార్ట్ కొనుగోలు చేసిన విషయం తెలిసిందే. తన ప్రవర్తనపై వచ్చిన ఆరోపణలను ఆయన ఇంతకుముందే ఖండించారు. అయితే ఈ విషయం విచారణ దశలో ఉన్నందున బిన్నీని రాజీనామా చేసేలా సంస్థ ఒత్తిడి తెచ్చినట్లు తెలుస్తోంది. తనపై వచ్చిన ఆరోపణలపై బిన్నీ స్పందించిన తీరు సరిగా లేదని, దీంతో పాటు విచారణ పారదర్శకంగా సాగాలనే ఉద్దేశంతో ఆయన రాజీనామాను ఆమోదించినట్లు వాల్‌మార్ట్ తెలిపింది.

ఫ్లిప్‌కార్ట్ కో ఫౌండర్‌గా బిన్నీ బన్సాల్ సంస్థ పురోగతిలో ప్రధాన పాత్ర పోషించారు. ఫ్లిప్‌కార్ట్‌ను వాల్‌మార్ట్ కొనుగోలు చేసిన తర్వాత సచిన్ బన్సల్ తన పూర్తి వాటాను అమ్ముకొని వెళ్లిపోగా.. బిన్నీ బన్సల్ మాత్రం సీఈవోగా కొనసాగారు.

బిన్నీ వ్యక్తిగత ప్రవర్తన సరిగా లేదంటూ ఇటీవల ఆరోపణలు వచ్చాయి. వీటిని ఆయన తీవ్రంగా ఖండించారు. ప్రస్తుతానికి పదవి నుంచి తప్పుకున్నా.. బోర్డులో తన సభ్యత్వాన్ని వదులుకుంటారా లేదా అనే అంశంపై స్పష్టత లేదు.