త‌గ్గిన విదేశీ మార‌క‌పు నిల్వ‌లు

భార‌త‌దేశ‌ ఫారెక్స్‌ నిల్వలు తగ్గాయి. ఇవి జూన్‌ 1తో ముగిసిన వారంలో 593.7 మిలియన్‌ డాలర్ల క్షీణతతో 412.23 బిలియన్‌ డాలర్లకు పరిమితమయ్యాయి. బంగారు నిల్వల తగ్గుదల దీనికి ప్రధాన కారణమని రిజర్వు బ్యాంక్‌ తెలిపింది. ప్రధానమైన కరెన్సీ అసెట్స్‌ 81.3 మిలియన్‌ డాలర్ల క్షీణతతో 387.51 బిలియన్‌ డాలర్లకు తగ్గాయి.

చాలా వారాల నుంచి స్థిరంగా ఉంటూ వస్తున్న బంగారు నిల్వలు 511 మిలియన్‌ డాలర్లు తగ్గాయి. దీంతో ఇవి 21.18 బిలియన్‌ డాలర్లకు క్షీణించాయి. ఇక భారత్‌కు ఇంటర్నేషనల్‌ మానిటరీ ఫండ్‌ (ఐఎంఎఫ్‌) వద్ద ఉన్న స్పెషల్‌ డ్రాయింగ్‌ రైట్స్‌ విలువ 0.6 మిలియన్‌ డాలర్లతో క్షీణతతో 1.49 బిలియన్‌ డాలర్లకు, రిజర్వు పొజిషన్‌ విలువ 0.8 మిలియన్‌ డాలర్ల క్షీణతతో 2.02 బిలియన్‌ డాలర్లకు తగ్గింది.