GST on Banking Services: ఉచిత బ్యాంకింగ్ సేవ‌ల‌పై జీఎస్టీ లేన‌ట్లేనా?

బ్యాంకులు తమ ఖాతాదారులకు ఉచితంగా అందజేస్తున్న వివిధ రకాల సేవలపై వస్తు, సేవల పన్ను (జీఎస్టీ)ను విధించే అంశంపై గందరగోళం నెలకొన్నది. దీంతో ఈ గందరగోళాన్ని తొలగించేందుకు రెవెన్యూ విభాగాన్ని కేంద్ర ఆర్థిక సేవ‌ల విభాగం ఆశ్ర‌యించింది. దీనిపై ఆర్థిక శాఖ ఒక తుది నిర్ణ‌యానికి వ‌చ్చింది.

చెక్కుబుక్‌ జారీ, ఏటీఎం విత్‌డ్రాయెల్స్‌ వంటి బ్యాంకింగ్‌ ఉచిత సేవలపై వస్తు, సేవల పన్ను (జీఎస్‌టీ) విధింపు ఉండబోదని ఆర్థికశాఖ సీనియర్‌ అధికారి ఒకరు తెలిపారు. ఈ విషయంపై ఎటువంటి సందేహాలూ లేకుండా చూడాలని రెవెన్యూ శాఖను ఆర్థిక సేవల శాఖ (డీఎఫ్‌ఎస్‌) కోరినట్లు సమాచారం. ఈ విషయంపై రెవెన్యూ శాఖ త్వరలో ఒక స్పష్టమైన వివరణ ఇచ్చే అవకాశం ఉందని ఉన్నతస్థాయి అధికారి ఒకరు తెలిపారు. బ్యాంకింగ్‌ ఉచిత సేవలకు సంబంధించి లెవీలపై బ్యాంకులు ట్యాక్స్‌ నోటీసు అందుకున్న విషయం తెలిసిందే. దీంతో ఈ సేవలపై కూడా జీఎస్‌టీ ఉంటుందా? అన్న అంశంపై రెవెన్యూ శాఖను డీఎఫ్‌ఎస్‌ సంప్రదించింది.