నాలుగు నెలల గరిష్ఠానికి బంగారం ధరలు

దేశంలో బంగారం ధర నాలుగు నెలల గరిష్ఠానికి చేరుకుంది. 10 గ్రాముల బంగారం ధర తిరిగి రూ. 30వేల మార్కును దాటేసింది. శనివారం బులియన్ మార్కెట్‌లో 24 క్యారెట్ల 10 గ్రాముల బంగారం ధర రూ. 325 పెరిగి రూ. 30,175కే చేరింది. అంతర్జాతీయ మార్కెట్లో డిమాండ్‌ పెరగడంతో పాటు పెళ్లిళ్ల సీజన్‌ కారణంగా దేశీయంగా నగల కొనుగోళ్లు పెరగడంతో ధర బాగా పెరిగింది. గతేడాది అక్టోబరు 18న పది గ్రాముల బంగారం ధర రూ.30,325 తాకింది. మళ్లీ నాలుగు నెలల తరవాత ఫిబ్రవరి 25న మళ్లీ రూ. 30వేలు దాటింది.

మరోవైపు వెండి ధర కూడా రూ. 600 పెరిగింది. శనివారం బులియన్ మార్కెట్‌లో కిలో వెండి రూ.43,800కు చేరింది. పారిశ్రామిక వర్గాలు, నాణేల తయారీదారుల నుంచి డిమాండ్‌ బాగా పెరగడంతో వెండి ధర కూడా పైకెక్కింది. ఇక అంతర్జాతీయంగా చూస్తే.. న్యూయార్క్ మార్కెట్‌లో ఔన్సు బంగారం ధర 0.61 శాతం పెరిగి 1,256.90 యూఎస్ డాలర్లకు చేరింది. ఔన్సు వెండి ధర 0.99 శాతం పెరిగి 18.33 డాలర్లుగా ఉంది.

కాగా, హైదరాబాద్‌లో శనివారం 24 క్యారెట్ల 10 గ్రాముల బంగారం ధర రూ. 30,427 కాగా.. 22 క్యారెట్ల 10 గ్రాముల బంగారం ధర 28,450గా ఉంది.