అమెజాన్.. గూగుల్‌ బ్రాండ్లకు ప్రపంచం ఫిదా!

ఒక వస్తువు పేరొందిన సంస్థ నుంచి వచ్చిందంటే.. దాని గురించి వేరే ఆలోచన చేయకుండా వెంటనే కొనేస్తాం. ఎందుకంటే.. వాటిపై ఉండే నమ్మకం అలాంటిది మరి. ప్రస్తుతం ప్రపంచవ్యాప్తంగా ఎన్నో రకాల బ్రాండ్లు వినియోగదారుల విశ్వాసాన్ని చూరగొన్నాయి. వీటిలో అత్యధిక విశ్వసనీయంగా నిలుస్తున్న బ్రాండ్ ఏమిటో తెలుసా? అదే అమెజాన్! ఈ సంస్థ ఆపిల్‌ను సైతం వెనక్కి నెట్టేసి.. విశ్వసనీయ బ్రాండ్‌గా ప్రపంచంలో అగ్రస్థానంలో నిలిచింది.

న్యూయార్క్‌కు చెందిన కోహన్ అండ్ ఉఫే సంస్థ జరిపిన అధ్యయనంలో అమెజాన్ తర్వాత యాపిల్, మైక్రోసాఫ్ట్, గూగుల్, పేపాల్ సంస్థలు ప్రపంచవ్యాప్తంగా ప్రజలు విశ్వసించే బ్రాండులుగా నిలిచాయి.

ఇక ఇండియా ప్రజలైతే ‘గూగుల్’నే అత్యధికంగా విశ్వసిస్తున్నట్లు వెల్లడించారు. దీని తర్వాతి స్థానాల్లో మైక్రోసాఫ్ట్‌, అమెజాన్‌, మారుతీ సుజుకీ, యాపిల్‌ నిలిచాయి. సోనీ, యూట్యూబ్‌, బీఎండబ్ల్యూ, మెర్సిడెస్‌ బెంజ్‌, బ్రిటీష్‌ ఎయిర్‌వేస్‌ సైతం ఈ జాబితాలో ఉన్నాయి.

కోహన్‌ అండ్‌ వూఫే సంస్థ బ్రెజిల్‌, కెనడా, చైనా, ఫ్రాన్స్‌, హాంగ్‌కాంగ్‌, ఇండియా, ఇండోనేషియా, ఇటలీ, సింగపూర్‌, స్పెయిన్‌, స్వీడన్‌, యునైటెడ్‌ అరబ్‌ ఎమిరేట్స్‌, బ్రిటన్‌, అమెరికా దేశాల్లో ఈ అధ్యయం జరిపింది. 1400 బ్రాండ్లపై 15,000 మంది నుంచి అభిప్రాయాలు సేకరించింది.

బ్రాండ్లను ఎంపిక చేసుకునే విషయంలో భారతీయులు చురుకుగా వ్యవహరిస్తున్నట్లు అధ్యయనంలో పేర్కొన్నారు. భారత్‌లో 67% మంది వినియోగదారులు బ్రాండు మంచిదని నమ్మితేనే కొనుగోళ్లు జరుపుతారని తెలిపారు.