నాలుగేళ్ల కనిష్టానికి భారత వృద్ధిరేటు: సీఎస్ఓ

గత ఏడాదితో పోలిస్తే.. ప్రస్తుత ఆర్థిక సంవత్సరం భారత వృద్ధి రేటు మందగించిందని తెలుస్తోంది. 2017-18లో మన జీడీపీ ప్రగతి 6.5 శాతానికి పరిమితం కానుందని.. కేంద్ర గణాంక కార్యాలయం (సీఎస్ఓ) అంచనా వేసింది. గత ఆర్థిక సంవత్సరంలో భారత ఆర్థిక వ్యవస్థ 7.1 శాతం పురోగతి సాధించింది. జీడీపీ నుంచి నికర పన్నులను మినహాయించగా.. జీవీఏ (గ్రాస్ వాల్యూ యాడెడ్) వస్తుంది. 2016-17లో జీవీఏ వృద్ధి 7.1 శాతంగా ఉంది. కానీ ప్రస్తుత ఏడాది అది 6.7 శాతానికి తగ్గనుందని తెలుస్తోంది. ఆర్‌బీఐ అంచనాల కంటే ప్రభుత్వ అంచనాలు తక్కువగా ఉండటం గమనార్హం.

గత ఏడాదితో పోలిస్తే ఈసారి వ్యవసాయ రంగ పురోగతి తక్కువగా ఉందని సీఎస్‌వో తెలిపింది. గత ఏడాది వ్యవసాయం, అనుంబంధ రంగాలు 4.9 శాతం వృద్ధి చెందగా.. ఈసారి అది 2.1 శాతానికే పరిమితమైంది. ఉత్పత్తి రంగం పురోగతి కూడా 7.9 శాతం నుంచి 4.6 శాతానికి తగ్గింది.

ఈ ఆర్థిక సంవత్సరంలో ఎలక్ట్రిసిటీ అండ్ ట్రేడ్, హోటల్ రంగాల్లు మాత్రమే వృద్ధి బాటలో సాగాయి. గత ఏడాది ఈ రంగాలు 7.5 శాతం చొప్పున అభివృద్ధి చెందగా.. ఈ ఆర్థిక సంవత్సరంలో అది 8.7 శాతంగా ఉంది. ఆర్థిక శాఖ బడ్జెట్ కోసం కసరత్తు చేస్తున్న ప్రస్తుత తరుణంలో వెలువడిన ఈ అంచనాలు కీలకం కానున్నాయి.