Hero బైక్ కొనాలనుకుంటున్నారా? వెంటనే కొనేయండి.. ధరలు పెరుగుతున్నాయ్!

Hero MotoCorp: దేశీయ దిగ్గజ టూ-వీలర్ తయారీ సంస్థ హీరో మోటో కార్ప్ బుధవారం కీలక ప్రకటన చేసింది. మరోసారి ధరలు పెంచుతున్నట్లు ప్రకటించి తమ కస్టమర్లకు షాక్ ఇచ్చింది. తమ కంపెనీకి చెందిన పలు మోడళ్ల మోటార్ సైకిళ్లు, స్కూటర్ల ధరలు ఏప్రిల్ 1 నుంచి 2 శాతం మేర పెంచుతున్నట్లు స్టాక్ ఎక్స్చేంజి ఫైలింగ్‌లో పేర్కొంది. కర్బన ఉద్గారాల నిబంధనలు పాటించడంలో భాగంగా ఉత్పత్తి వ్యయం భారీగా పెరిగిపోతోందని, అందుకే వాహనాల ధరలు పెంచే నిర్ణయం తీసుకున్నట్లు తెలిపింది. ఈ క్రమంలో హీరో బైక్ (hero bike price hyderabad) తీసుకోవాలని భావిస్తున్న వారు వెంటనే కొనుగోలు చేసుకోవడం మంచిది. ఏప్రిల్ 1 తర్వాత హీరో వాహనాలు మరింత ప్రియం కానున్నాయి.

హీరో మోటోకార్ప్ (Hero MotoCorp Vehicles) ప్రకటించిన తాజా నిర్ణయంతో ఆ కంపెనీకి చెందిన అన్ని మోటార్ సైకిళ్లు, స్కూటర్ల ఎక్స్ షోరూమ్ ధరలు ఏప్రిల్ 1 నుంచి మారనున్నాయి. మోడల్‌ను అనుసరించి మార్కెట్‌ను బట్టి ఈ ధరల పెంపు వర్తిస్తుందని కంపెనీ వెల్లడించింది. బీఎస్-6 ఫేజ్-2 ఉద్గార ప్రమాణాలను పాటించడంలో భాగంగా ధరలు పెంచేందుకు నిర్ణయం తీసుకోవాల్సి వచ్చిందని హీరో మోటో కార్ప్ తెలిపింది. 'ఓబీడీ-2 ట్రాన్సిషన్ కారణంగా ఉత్పత్తి వ్యయం పెరుగుతోంది. దీంతో వాహనాల ధరలు సవరించాల్సి వస్తోంది. కస్టమర్లకు ఎలాంటి ఇబ్బందులు లేకుండా హీరో మోటో కార్పు అధునాతన ఫైనాన్షింగ్ సొల్యూషన్స్‌ను కొనసాగిస్తూనే ఉంటుంది. రూరల్ మార్కెట్ డిమాండ్ పెరుగుతోంది. సోషల్ సెక్టార్‌లో ప్రభుత్వ పథకాలు తీసుకురావడంపై మా కృతజ్ఞతలు. రానున్న పండుగల సీజన్‌లో డిమాండ్ మరింత పెరుగుతుందని భావిస్తున్నాం.' అని తెలిపింది హీరో మోటో కార్ప్.

గతం ఏడాది 2022 డిసెంబర్‌లోనూ హీరో తన వాహనాల ధరలను పెంచింది. మరోవైపు.. ఏప్రిల్ 1 నుంచి అమలులోకి రానున్న ఉద్గార నిబంధనలకు అనుగుణంగా హీరో సహా ఇతర కంపెనీలు సైతం కొత్త ఉద్గార ప్రమాణాలను అందుకునేందుకు తమ వాహనాల్లో మార్పులు చేస్తున్నాయి. ఆన్ బోర్డ్ డయాగ్నోస్టిక్స్ను ఏర్పాటు చేస్తున్నాయి. దీని ద్వారా వాహనం నుంచి ఎంతెంత ఉద్గారాలు విడుదల అవుతున్నాయో తెలుసుకునే వీలుంటుంది. హీరో మోటోకార్ప్ ఇటీవల భారత్‌లో సరికొత్త జూమ్ 110ని విడుదల చేసింది. దీని ఎక్స్ షోరూమ్ ధర రూ.68,599గా ఉంది. దీంతో పాటు సూపర్ స్ప్లెండర్ హైటెక్ XTEC వేరియంట్‌ను కూడా మార్కెట్లోకి తీసుకొచ్చింది. దీని ఎక్స్ షోరూమ్ ధర రూ.83,368గా నిర్ణయించింది హీరో మోటో కార్ప్. హీరో మోటోకార్ప్ తమ వాహనాల ధరల పెంపు కొద్ది కాలంలోనే ఇది రెండోసారి. మరోవైపు.. టాటా మోటార్స్ సైతం తాజాగా తమ కమర్షియల్ వాహనాల ధరలను 5 శాతం మేర పెంచుతున్నట్లు ప్రకటించిన విషయం తెలిసిందే.

• Read Latest Business News and Telugu News