Hyderabad: కూకట్‌పల్లిలో 264 ఎకరాలకు రూ.3402 కోట్లు.. దిగ్గజ సంస్థ విక్రయం!

Hyderabad: హైదరాబాద్ మహానగరంలో రియల్ఎస్టేట్ వేగంగా అభివృద్ధి చెందుతోంది. నలుదిక్కల భూముల ధరలు ఆకాశాన్నంటుతున్నాయి. ఏ ప్రాంతంలో చూసిన ధరలు కోట్లలోనే పలుకుతున్నాయి. తాజాగా ఓ దిగ్గజ సంస్థ వందల ఎకరాల భూమిని విక్రయానికి పెట్టింది. హైదరాబాద్ కూకట్‌పల్లిలో ఉన్న తమ 264.50 ఎకరాలు విక్రయిస్తోంది హిందూజా గ్రూప్ సంస్థ జీఓసీఎల్ కార్పొరేషన్ (GOCL Corporation). ఒక్కో ఎకరానికి సుమారు రూ.12.87 కోట్ల చొప్పున విక్రయిస్తున్నట్లు బుధవారం వెల్లడించింది. మొత్తం 264.50 ఎకరాల భూమిని రూ.3402 కోట్లకు విక్రయిస్తున్నట్లు ప్రకటించింది.

ఈ విక్రయంలో భాగంగా హైదరాబాద్ కేంద్రంగా కార్యకలాపాలు సాగిస్తున్న స్వ్కేర్ స్పేస్ బిల్డర్స్ ప్రైవేట్ లిమిటెడ్ తో ఒప్పందం చేసుకున్నట్లు జీఓసీఎల్ తెలిపింది. ఈ ఒప్పందంలో భాగంగా 32 ఎకరాల స్థలాన్ని హిందూజా హెల్త్‌కేర్ లిమిటెడ్ (హెచ్ఎచ్ఎల్ గతంలో హిందూజా ఎస్టేట్స్ ప్రైవేట్ లిమిటెట్) తో కలిసి అభివృద్ధి చేసేలా జాయింట్ డెవలప్‌మెంట్ అగ్రిమెంట్ (JDA) కుదుర్చుకున్నట్లు వివరించింది. ఈ ప్రక్రియ మొత్తం రానున్న 18 నెలల్లో పూర్తి కావాల్సి ఉందని తెలిపింది.

264 ఎకరాల భూమిని రూ.3402 కోట్లకు విక్రయిస్తుండగా.. ఈ డీల్‌లో భాగంగా మొదటి వాయిదా కింద రూ.520 కోట్లను అందుకుంటామని జీఓసీఎల్ వెల్లడించింది. జేడీఏ కింద అభివృద్ధి చేయనున్న 32 ఎకరాల్లో 12.50 ఎకరాలను వెంటనే విక్రయిస్తామని పేర్కొంది. తమకు మొదటి వాయిదాగా అందే రూ.502 కోట్లలో.. రూ.160 కోట్లు ఈ 12.50 ఎకరాల అమ్మకం ద్వారానే లభిస్తాయని తెలిపింది. తదుపరి దశల్లో జరిగే విక్రయాల ద్వారా మిగిలిన నిధులు కంపెనీకి సమకూరుతాయని తెలిపింది. జీఓసీఎల్ దాని అనుబంధ సంస్థలు ఎనర్జటిక్స్, కమెర్షియల్ ఎక్స్‌ప్లోసివ్స్ లో వివిధ రకాల ఉత్పత్తులను తయారు చేస్తుంది. ప్రధానంగా డిఫెన్స్, స్పెస్ సెక్టార్ కోసం ప్రత్యేక ఉత్పత్తులను డిజైన్ చేస్తుంటుంది. పేలుడు కోసం ఉపయోగించే ప్రత్యేక మెటల్ క్లాడింగ్ సొల్యూషన్స్ అందిస్తుంటుంది.