Gold Hallmark: బంగారంపై కొత్త రూల్.. నగలపై 'హాల్‌మార్క్' ఐడీ ఇలా వెరిఫై చేయండి!

Gold Hallmark: బంగారం విక్రయాలకు సంబంధించిన కొత్త నిబంధనలు ఏప్రిల్ 1 నుంచి అమలులోకి వచ్చాయి. గోల్డ్ హాల్‌మార్కింగ్‌కు సంబంధించిన కొత్త నిబంధనలను కేంద్ర ప్రవేశపెట్టింది. ఇకపై నగల దుకాణాల్లో విక్రయించే గోల్డ్ జువెలరీపై యూనిక్ ఐడెంటిఫికేషన్ నంబర్ తప్పనిసరిగా ఉండాల్సిందే. దీన్నే హాల్ మార్క్ యూనిక్ ఐడెంటిఫికెషన్ (HUID) అంటారు. బంగారం ఆభరణాలు కొనుగోలు చేసే కస్టమర్లు మోసపోకుండా ఈ చర్యలు తీసుకొచ్చింది కేంద్ర సర్కార్. గతంలోనే నగలపై హాల్‌మార్క్ తప్పనిసరిగా ఉంది. ఇప్పుడు హామ్ మార్క్‌తో పాటు హెచ్‌యూఐడీ సైతం ఉండాలి.

కొత్త నిబంధనల ప్రకారం ఆభరణాలపై మూడు రకాల గుర్తులు ఉంటాయి. వాటిలో మొదటిది బ్యూరో ఆఫ్ ఇండియన్ స్టాండర్డ్స్‌కి (BIS) చెందిన హాల్‌మార్క్, ఇది ట్రయాంగిల్ షేపులో ఉంటుంది. రెండోది ఆభరణాల్లో స్వచ్ఛతను తెలియజేసే 18కే, 22కే అని ముద్రించి ఉంటుంది. హెచ్‌యూఐడీ (Hallmark Unique Identification number) అనేది ఆరు అంకెల ఆల్ఫాన్యూమరిక్ కోడ్. ఇందులో అక్షరాలతో పాటు అంకెలు కలిసి ఉంటాయి. ఈ కోడ్ ప్రతీ నగపై వేరు వేరుగా ఉంటుంది. ఈ కోడ్‌తో ఆ నగకు సంబంధించి వివరాలను టేస్ చేయొచ్చు. ఆ బంగారం నగ ఎక్కడ తయారు చేశారు, హాల్‌మార్క్ ఎక్కడ వేశారు, స్వచ్ఛత వంటి పూర్తి వివరాలను తెలుసుకోవచ్చు.

బ్యూరో ఆఫ్ ఇండియన్ స్టాండర్డ్స్ ప్రత్యేకంగా అభివృద్ధి చేసిన యూప్‌లో హెచ్‌యూఐడీ నంబర్ ఎంటర్ చేసి నగలకు సంబంధించిన పూర్తి వివరాలను తెలుసుకోవచ్చు. దీని కోసం మీ స్మార్ట్‌ఫోన్‌లో BIS CARE యాప్ ఇన్‌స్టాల్ చేసుకోవాలి. యాప్ ఓపెన్ చేసిన తర్వాత వెరిపై హెచ్‌యూఐడీ పైన క్లిక్ చేయాలి. ఆ తర్వాత మీరు కొనుగోలు చేసిన నగలపై ఉన్న హాల్‌మార్క్ ఐడీ నంబర్ ఎంటర్ చేయాలి. ఆ నంబర్ సరైనదే అయితే, నగల వ్యాపారి పేరు, రిజిస్ట్రేషన్ నంబర్, హాల్‌మార్క్ వేసిన కేంద్రం పేరు, రికగ్నిషన్ నంబర్, అడ్రస్, నగల రకం, బంగారం స్వచ్ఛత, హాల్‌మార్క్ వేసిన తేదీ వంటి పూర్తి వివరాలను మీకు కనిపిస్తాయి.

మీరు ఇకపై ఏ నగల దుకాణంలో కొనుగోలు చేసినా దానిపై హాల్‌మార్క్ నంబర్ చెక్ చేసి కొనండి. డబ్బులు చెల్లించే ముందే బీఐఎస్ యాప్‌లో వెరిఫై చేసుకోండి. ఇప్పటికే హాల్ ‌మార్క్ ఒక్కటే వేసి ఉన్న నగలు చెల్లుతాయి. అయితే, ఏప్రిల్ 1 తర్వాత విక్రయిస్తున్న ఆభరణాలకు మాత్రం హాల్ మార్క్ నంబర్ హెచ్‌యూఐడీ తప్పనిసరి. అది లేకపోతే ఆ బంగారం నగలను విక్రయించకూడదు.

• Read Latest Business News and Telugu News