వరల్డ్ బ్యాంక్ సర్వేలో భాగ్యనగరానికి రెండో స్థానం

జీవించడానికి దేశంలోనే అత్యంత అనుకూలమైన హైదరాబాద్.. వ్యాపారం చేసేందుకు కూడా ఉత్తమ నగరమని తేలింది. ప్రపంచ బ్యాంక్ ప్రకటించిన ఈజ్ ఆఫ్ డూయింగ్ బిజినెస్‌ జాబితాలో భాగ్యనగరం రెండోస్థానంలో నిలిచింది. వ్యాపారం ప్రారంభించడం, నిర్మాణ అనుమతులు, ఆస్తుల రిజిస్ట్రేషన్, పన్నుల చెల్లింపు, తదితర అంశాల ఆధారంగా దేశవ్యాప్తంగా 17 నగరాల్లో ప్రపంచ బ్యాంక్ ఈ సర్వే నిర్వహించింది. ఇందులో పంజాబీ నగరం లుధియానా తొలిస్థానం దక్కించుకుంది. ఒప్పందాల అమలు, వివాదాల పరిష్కారంలో హైదరాబాద్ ముందంజలో ఉంది.

వ్యాపారాల ప్రారంభంలో న్యూఢిల్లీ తొలిస్థానంలో ఉండగా, నవాబుల నగరం నాలుగోస్థానంలో నిలిచింది. నిర్మాణాలకు సంబంధించిన అనుమతుల జారీలో బెంగళూరు మొదటి స్థానంలో ఉండగా, హైదరాబాద్ నాలుగో స్థానంలో ఉంది. పన్నుల చెల్లింపు, సరిహద్దుల వెంబడి వాణిజ్యంలో మాత్రం భాగ్యనగరం వెనుకబడింది. పన్నుల చెల్లింపులో లుధియానా తొలిస్థానంలో ఉండగా, సరిహద్దు వాణిజ్యంలో భువనేశ్వర్ ప్రథమ స్థానంలో నిలిచింది. ఆస్తుల రిజిస్ట్రేషన్లో గుర్గావ్ ముందంజలో ఉండగా, భాగ్యనగరం 9వ స్థానంలో ఉంది. ఈ ఏడాది జూలైలో ప్రపంచ బ్యాంక్ విడుదల చేసిన ఈజ్ ఆఫ్ డూయింగ్ బిజినెస్ రాష్ట్రాల జాబితాలో తెలంగాణ అగ్రస్థానంలో ఉన్న సంగతి తెలిసిందే.