కొత్త గ్రాండ్ ఐ10 @ రూ. 4.58 లక్షలు

హుందయి మోటార్ ఇండియా తన హ్యాచ్‌బ్యాక్ గ్రాండ్ ఐ10 కారు అప్‌డేటెడ్ వర్షన్‌ను సోమవారం ఢిల్లీలో విడుదల చేసింది. ఈ కొత్త గ్రాండ్ ఐ10 ధరలు రూ. 4.58 లక్షల (ఢిల్లీ ఎక్స్‌షోరూం) నుంచి ప్రారంభమవుతున్నాయి. పెట్రోల్ వేరియంట్ల ధరలు రూ. 4.58 లక్షల నుంచి రూ. 6.82 లక్షల మధ్య ఉండగా.. డీజిల్ కార్ల ధరలు రూ. 5.68 లక్షల నుంచి రూ. 7.32 లక్షల మధ్య ఉండనున్నాయి. ఇవన్నీ ఢిల్లీ ఎక్స్‌షోరూం ధరలు. ప్రాంతాల వారీగా ధరల్లో కొంచెం తేడాలు ఉంటాయి.

కొత్త గ్రాండ్ ఐ10 ఆవిష్కరణ సందర్భంగా హుందయి మోటర్ ఇండియా లిమిటెడ్ ఎండీ, సీఈవో వై.కె. కూ మాట్లాడుతూ.. భారత్‌లో ఇప్పటి వరకు 5.5 లక్షల గ్రాండ్ ఐ10 కార్లను విక్రయించినట్లు వెల్లడించారు. చిన్న కార్ల విభాగంలో 2017 గ్రాండ్ ఐ10 మరో కొత్త మైలురాయిని సాధిస్తుందని ఆయన ఆశాభావం వ్యక్తం చేసారు.

తాజాగా విడుదల చేసిన గ్రాండ్ ఐ10 కొత్త 1.2 లీటర్ పెట్రోల్, డీజిల్ ఇంజన్లతో లభిస్తోంది. ఎల్ఈడీ డేటైమ్ రన్నింగ్ లైట్స్, కొత్త అల్లాయ్ వీల్స్, ఫ్రంట్ ఎయిర్ కర్టయిన్స్, పూర్తి ఆటోమేటిక్ టెంపరేచర్ కంట్రోల్, వెనుకవైపునకు వ్యాపించేలా ఏసీ మరెన్నో ఫీచర్లు కొత్త గ్రాండ్ ఐ10లో ఉన్నాయి.