పాన్‌కు ఆధార్ అనుసంధానం ఇక సులభమే!

పాన్ కార్డ్‌(Permanent account number)కు ‘ఆధార్’ను అనుసంధించేందుకు ఆదాయ పన్ను (IT) శాఖ సరికొత్త సదుపాయాన్ని అందుబాటులోకి తెచ్చింది. ఐటీ రిటర్న్‌లు దరఖాస్తు చేయడానికి ఇప్పుడు ఆధార్ కార్డు నెంబరును తప్పకుండా పాన్ కార్డుకు అనుసంధించాల్సి ఉంటుంది. ఈ నేపథ్యంలో ఐటీ శాఖకు చెందిన ఇ-ఫిల్లింగ్ వెబ్‌సైట్ https://incometaxindiaefiling.gov.in లో కొత్తగా ఒక లింక్‌ను అందుబాటులోకి తెచ్చింది. దరఖాస్తుదారుడు ఈ లింక్ క్లిక్ చేసి తన పాన్ నెంబర్‌తోపాటు ఆధార్ నెంబర్‌ను కూడా ఇవ్వాలి.

ఆధార్‌లో పేర్కొన పేరును నమోదు చేయాలి. UIDAI (Unique Identification Authority of India) వెరిఫికేషన్ తర్వాత ఈ ప్రక్రియ పూర్తవుతుంది. దీనికి సంబంధించిన OTP (వన్ టైమ్ పాస్‌వర్డ్)ను రిజిస్టర్ చేసిన ఈమెయిల్ లేదా ఫోన్ నెంబరుకు అందుతుంది. పాన్ కార్డులో పేర్కొన్న ఆధార్‌లో పేర్కొన్న జన్మదిన తేదీలు ఒకేలా ఉండాలి.

ఈ సదుపాయాన్ని పొందేందుకు ఐటీ శాఖ వెబ్‌సైట్‌కు లాగిన్/రిజిస్టర్ కావాల్సిన అవసరం లేదు. హోం పేజ్‌లోని లింక్‌పై క్లిక్ చేసి పాన్ కార్డ్, ఆధార్ వివరాలను అందించవచ్చు. ఈ ఏడాది జులై 1 నుంచి పాన్ కార్డుకు దరఖాస్తు చేసుకునేవారికి ఆధార్‌ను తప్పనిసరి చేయనున్నారు.