ఐసీఐసీఐ ఏటీఎం ద్వారా 15 లక్షల రుణం

కస్టమర్లకు ఐసీఐసీఐ బ్యాంకు బంపర్ ఆఫర్ ప్రకటించింది. శాలరీ ఖాతాదార్లు ఏటీఎం ద్వారా రూ.15 లక్షల దాకా వ్యక్తిగత రుణం పొందే అవకాశం కల్పించింది. సేవింగ్స్ అకౌంట్ హోల్లర్డు సైతం ఈ అవకాశాన్ని సద్వినియోగం చేసుకోవచ్చని బ్యాంకు ఒక ప్రకటనలో తెలిపింది.

‘సిబిల్’ స్కోర్ ఆధారంగా ఖాతాదారులకు ఎంత మేరకు రుణం మంజూరు చేయవచ్చో బ్యాంకు నిర్ధరిస్తుంది. అర్హులైన వారికి రూ.15లక్షల దాకా పొందవచ్చు. నెలవారి చెల్లింపులకు (ఈఎంఐ) 60 నెలల (5 సంవత్సరాలు) వరకు గడువు ఉంటుంది. డెబిట్ కార్డు సాయంతో ఏటీఎంలో సదరు ఖాతాదారుడు ఎంతమేరకు రుణం పొందవచ్చో తెలుసుకునే వీలుంటుంది. అక్కడే రుణంపై వడ్డీ రేటు, ప్రాసెసింగ్ ఫీజు, ఈఎంఐల చెల్లింపులపై పూర్తి సమాచారం ఉంటుంది. ఖాతాదారునికి నచ్చితే ఏటీఎం పిన్ ఎంటర్ చేసిన క్షణాల్లో రుణం అకౌంట్లో జమ అవుతుందని బ్యాంకు అధికారులు తెలిపారు. బ్యాంకు వెబ్ సైట్, ఐమొబైల్, బ్యాంకు బ్రాంచీల వద్ద కూడా వ్యక్తిగత రుణం పొందవచ్చని వారు పేర్కొన్నారు.