ICICI Bank: ఐసీఐసీఐ కస్టమర్లకు గుడ్‌న్యూస్.. ఆ స్పెషల్ స్కీమ్ గడువు పొడిగింపు.. త్వరపడండి మరి!

ICICI Bank: దేశంలోని ప్రైవేటు రంగం బ్యాంకింగ్ దిగ్గజం ఐసీఐసీఐ బ్యాంక్ తమ కస్టమర్లకు గుడ్‌న్యూస్ చెప్పింది. సీనియర్ సిటిజన్ల కోసం తీసుకొచ్చిన స్పెషల్ ఎఫ్‌డీ స్కీమ్ ఐసీఐసీఐ బ్యాంక్ గోల్డెన్ ఇయర్స్ ఎఫ్‌డీ గడువు పొడిగించింది. ఈ ప్రత్యేక పథకం గడువు శుక్రవారంతో ముగుస్తున్న నేపథ్యంలో మరో ఆరు నెలలు పొడిగిస్తున్నట్లు కీలక ప్రకటన చేసింది. దీంతో ప్రత్యేకంగా రూపొందించిన అధిక వడ్డీ ఇచ్చే ఈ స్కీమ్ అక్టోబర్ 31, 2023 వరకు అందుబాటులో ఉంటుంది. బ్యాంకులో డబ్బులు దాచుకుని ఎక్కువ రాబడి కోరుకునే వారికి ఈ నిర్ణయం లబ్ధిచేకూర్చనుంది.

బ్యాంక్ వెబ్ సైట్ ప్రకారం.. ప్రస్తుతం ఐసీఐసీఐ బ్యాంక్ గోల్డెన్ ఇయర్స్ ఎఫ్‌డీ (ICICI Bank Golden Years FD) స్కీమ్‌ ద్వారా ఇప్పటికే వార్షిక వడ్డీపై ఉన్న 0.50 శాతం అదనపు వడ్డీపై సీనియర్ సిటిజన్లకు అదనంగా 0.10 శాతం మేర ఎక్కువ వడ్డీ అందిస్తోంది ఐసీఐసీఐ బ్యాంక్. ఈ నేపథ్యంలో ఈ స్పెషల్ స్కీమ్ పూర్తి వివరాలను ఇప్పుడు మనం తెలుసుకుందాం.

• ఐసీఐసీఐ బ్యాంక్ గోల్డెన్ ఇయర్స్ ఎఫ్‌డీ దరఖాస్తు చేసుకునేందుకు అక్టోబర్ 31, 2023 వరకు అవకాశం ఉంది.
• ఈ స్పెషల్ స్కీమ్‌ను మే 20, 2020 రోజున అందుబాటులోకి తీసుకొచ్చారు.
• కొత్తగా డిపాజిట్ చేసే వారితో పాటు ఇప్పటికే ఉన్న డిపాజిట్లను రెన్యువల్ చేసే వారికి అదనపు వడ్డీ రేటును కల్పిస్తున్నారు.
• ఐసీఐసీఐ బ్యాంక్ గోల్డెన్ ఇయర్స్ ఎఫ్‌డీ టెన్యూర్ 5 ఏళ్ల ఒక రోజు నుంచి 10 ఏళ్ల వరకు ఉంటుంది.
• అర్హత కలిగిన వారు రూ.2కోట్లలోపు నగదుతో ఫిక్స్‌డ్ డిపాజిట్ ఖాతా తెరవొచ్చు.
• ఈ పథకంలోని నగదు మొత్తంతో పాటు వడ్డీ పైనా 90 శాతం వరకు లోన్ సౌకర్యం సైతం పొందవచ్చు.
• ఈ స్పెషల్ స్కీమ్‌లో చేరడం ద్వారా క్రెడిట్ కార్డు సైతం దరఖాస్తు చేసుకునే వీలుంటుంది.
• ప్రస్తుతం ఈ పథకంలో సీనియర్ సిటిజన్లకు 7.5 శాతం వడ్డీ రేటును అందిస్తున్నారు.
• సాధారణ కస్టమర్లకు 6.9 శాతంతో పోలిస్తే అదనంగా 60 బేసిస్ పాయింట్లు అదనం

ఐసీఐసీఐ బ్యాంక్ ఇంటర్నెట్, మొబైల్ బ్యాంకింగ్ ద్వారా కూడా ఈ స్పెషల్ ఐసీఐసీఐ బ్యాంక్ గోల్డెన్ ఇయర్స్ ఎఫ్‌డీ స్కీమ్‌ ఖాతాను తెరవచొచ్చు. అలాగే సమీపంలోని ఐసీఐసీఐ బ్యాంక్ బ్రాంచ్‌కి వెళ్లి సైతం ఖాతా తీసుకోవచ్చు. ఈ పథకంలో చేరడం ద్వారా సీనియర్ సిటిజన్లకు మంచి రాబడి అందుకునే వీలుంది.

• Read Latest Business News and Telugu News