రీఛార్జులపై ఐడియా రూ.3,300 క్యాష్‌బ్యాక్ ఆఫర్

రిలయన్స్ జియోకు పోటీగా టెలీకాం సంస్థ ఐడియా సెల్యులర్ భారీ క్యాష్‌బ్యాక్ ఆఫర్లను ప్రకటించింది. ఆన్‌లైన్, డిజిటల్ ప్లాట్‌ఫాంల ద్వారా రీఛార్జులు చేసుకుంటే రూ.3,300 విలువ చేసే క్యాష్‌బ్యాక్ పొందొచ్చని ప్రకటించింది. రూ.398 అంతకు మించి రీఛార్జ్ చేసుకునే అన్ని అన్‌లిమిటెడ్ ప్లాన్లకు ఈ క్యాష్‌బ్యాక్ ఆఫర్ వర్తిస్తుందని చెప్పింది. ‘మ్యాజిక్ క్యాష్‌బ్యాక్’ కింద రీఛార్జ్ చేసుకునే ఐడియా ప్రీపెయిడ్ కస్టమర్లకు ఈ ఆఫర్ వర్తిస్తుంది. ఏ ఛానెల్ ద్వారా అయినా రూ.398 అంతకు మించి రీఛార్జ్ చేసుకుంటే రూ.50 చొప్పున 8 డిస్కౌంట్ వోచర్లను పొందొచ్చు.

ఈ వోచర్లను రూ.300 అంతకంటే ఎక్కువ రీఛార్జ్ చేసుకున్నప్పుడు ఉపయోగించుకోవచ్చు. ఈ వోచర్ల కాలపరిమితి ఏడాది. అలాగే రూ.2,700 విలువ చేసే ఐదు షాపింగ్ కూపన్లను కూడా వినియోగదారుడు పొందుతాడు. వీటిని ఐడియా భాగస్వామ్య స్టోర్లు, వెబసైట్లలో పలు బ్రాండ్లపై షాపింగ్ చేసినప్పుడు వాడుకోవచ్చు. ఒకవేళ ‘మ్యాజిక్ క్యాష్‌బ్యాక్’ ఆఫర్ కింద మై ఐడియా యాప్ లేదా కంపెనీ వెబ్‌సైట్ ద్వారా రీఛార్జ్ చేసుకుంటే రూ.200 వ్యాలెట్ క్యాష్‌బ్యాక్ కూడా పొందొచ్చని కంపెనీ వెల్లడించింది. ‘మ్యాజిక్ క్యాష్‌బ్యాక్’ ఆఫర్ ఈ ఏడాది ఫిబ్రవరి 10 వరకు మాత్రమే అందుబాటులో ఉంటుందని, ఇది కేవలం ప్రీపెయిడ్ కస్టమర్లకు మాత్రమే అని కంపెనీ ఓ ప్రకటనలో తెలిపింది.