ఉక్కుపై ప‌న్ను ప్ర‌భావం భార‌త్‌పై ఉండ‌దు: అరుణా శ‌ర్మ‌

స్టీల్‌ దిగుమతులపై భారీగా పన్ను విధించాలనే అమెరికా అధ్యక్షుడు డొనాల్డ్‌ ట్రంప్‌ నిర్ణయం భారత్‌పై ఎటువంటి తక్షణ ప్రభావం ఉండకపోవచ్చని అంచనా వేస్తున్నట్లు శుక్రవారం ఉక్కు మంత్రిత్వ శాఖ కార్యదర్శి అరుణా శర్మ తెలిపారు. అమెరికా ఉత్పత్తి దారులను కాపాడేందుకు దిగుమతి ఉక్కు, అల్యూమినియం దిగుమతులపై భారీ సుంకాలు విధిస్తున్నట్లు గురువారం ట్రంప్‌ ప్రకటించారు.

ప్రధాన వాణిజ్య భాగస్వాములైన చైనా, ఐరోపా, పొరుగున ఉన్న కెనడా వంటి దేశాలపై అమెరికా నిర్ణ‌యం ప్రభావం చూపనుంది. తాము కేవలం రెండు శాతం మాత్రమే స్టీల్‌ను అమెరికాకు ఎగుమతి చేస్తున్నామని, దాని వల్ల భారత్‌పై ప్రభావం చూపించకపోవచ్చునని అరుణా శర్మ తెలిపారు. కానీ సెక్షన్‌ 232 ప్రామాణికత సుంకంపై ఆంక్షలకు ఉపయోగపడుతుందని పేర్కొన్నారు.


అంత‌ర్జాతీయ ఒప్పందాల ప్ర‌కారం దేశంలో ఒక ఉత్ప‌త్తి లేదా వ‌స్తువు ధ‌ర‌ల మార్పు దేశంలో ఉపాధిపై, ప‌రిశ్ర‌మ‌ల‌పై ప్ర‌భావం చూపిస్తుంద‌ని భావించిన నేప‌థ్యంలో కావాల్సిన దానిపై అద‌న‌పు సుంకం విధించే వెసులుబాటు ఆయా దేశాల‌కు ఉంది. దాని ప్ర‌కార‌మే ప్ర‌స్తుతం అమెరికా ఉక్కు దిగుమ‌తుల‌పై సుంకం విధించింది.