యాప్నగరం

చౌక ధరల విమానయానం ఇండిగోకి కొత్త సీఈవో.. ఆయన ఎవరంటే..?

కరోనా కష్టకాలంలో ఇండిగో ఎయిర్‌లైన్స్‌ను ముందుండి నడిపించిన సీఈవో రోనోజోయ్ దత్తా త్వరలోనే పదవీ విరమణ కాబోతున్నారు. సెప్టెంబర్ ఆఖరితో ఆయన పదవీ కాలం ముగుస్తోంది. దీంతో కొత్త సీఈవోని కంపెనీ ఎంపిక చేసింది. నెదర్లాండ్స్‌కి చెందిన పీటర్ ఎల్బర్స్‌ని కొత్త సీఈవోగా నియమించింది. ఎల్బర్స్‌కి ఉన్న గ్లోబల్ ఎక్స్‌పీరియెన్స్ సంస్థకు ఎంతో సాయం చేయనుంది.

Authored byKoteru Sravani | Samayam Telugu 18 May 2022, 8:16 pm

ప్రధానాంశాలు:

  • ఇండిగోకి కొత్త సీఈవో
  • పీటర్ ఎల్బర్స్ ఎంపిక
  • రోనోజోయ్ దత్తా పదవీ విరమణ
  • అక్టోబర్ 1న ఎల్బర్స్ జాయినింగ్
హైలైట్స్ చదవాలంటే యాప్‌ను డౌన్‌లోడ్ చేసుకోండి
Samayam Telugu Indigo New CEO Pieter Elbers
చౌక ధరల విమానయాన సంస్థ IndiGoకు కొత్త సీఈవో వచ్చేస్తున్నారు. ప్రస్తుత సీఈఓ రోనోజోయ్ దత్తా పదవీ కాలం 2022 సెప్టెంబర్ 30తో ముగుస్తోన్న నేపథ్యంలో.. కొత్త సీఈవోగా పీటర్ ఎల్బర్స్(Pieter Elbers) ఎంపికయ్యారు. ఈ విషయాన్ని కంపెనీ బుధవారం పత్రికా ప్రకటనలో వెల్లడించింది. రెగ్యులేటరీ ఆమోదాలకు అనుగుణంగా పీటర్ ఎల్బర్స్‌ని ఇంటర్‌గ్లోబ్ ఏవియేషన్ లిమిటెడ్(ఇండిగో) చీఫ్ ఎగ్జిక్యూటివ్ ఆఫీసర్‌గా నియమిచ్చేందుకు బోర్డు ఆఫ్ డైరెక్టర్లు ఆమోదం తెలిపినట్టు కంపెనీ పేర్కొంది. 2022 అక్టోబర్ 1న పీటర్ తమ విమానయాన సంస్థలో చేరతారని ఇండిగో తెలిపింది. ఏవియేషన్ ఇండస్ట్రీకి కష్టకాలమైన కరోనా సమయంలో తమకు దిశానిర్దేశం చేసిన రోనోజోయ్ దత్తా సెప్టెంబర్ 30న పదవీ విరమణ తీసుకోవాలని నిర్ణయించుకున్నారని కంపెనీ పేర్కొంది.
‘‘ నాలుగేళ్ల పాటు వ్యాపారాలను ముందుండి నడిపించినందుకు రోనోకు బోర్డు ఆఫ్ డైరెక్టర్లు, నేను ధన్యవాదాలు తెలుపుతున్నాం. ఈ సమయంలో ఏవియేషన్ ఇండస్ట్రీ అత్యంత కష్టకాలాన్ని ఎదుర్కొంది. ఎయిర్ లైన్ చరిత్రలో చూడని సంక్షోభం ఈ సమయంలో వచ్చింది’’ అని ఇండిగో మేనేజింగ్ డైరెక్టర్ రాహుల్ భాటియా తెలిపారు.

ప్రస్తుతం ఇండిగో సీఈవోగా ఎంపికైన ఎల్బర్స్... 1992లో కేఎల్ఎంలో తన కెరీర్ ప్రారంభించారు. నెదర్లాండ్స్‌లో, జపాన్‌లో, గ్రీస్‌లో, ఇటలీలో పలు మేనేజిరియల్ పొజిషన్లను నిర్వహించారు. నెదర్లాండ్స్‌కి వెళ్లిన తర్వాత.. నెటవర్క్ అండ్ అలయెన్స్‌ సీనియర్ వైస్ ప్రెసిడెంట్‌గా ఎంపికయ్యారు. ఇండిగో టీమ్‌తో కలిసి పనిచేయడం అదృష్టంగా భావిస్తానని ఎల్బర్స్ చెప్పారు.

16 ఏళ్ల క్రితం ఉద్యోగులు, మేనేజ్‌మెంట్ టీమ్ కలిసి ఏర్పాటు చేసిన ఇండిగో ఎంతో ఆకట్టుకునే విధంగా ఉందని పేర్కొన్నారు. తదుపరి ఇండిగో అద్భుతమైన పయనంలో తాను భాగస్వామ్యం కావడం ఎంతో ఆనందంగా భావిస్తున్నానని చెప్పారు. ఎయిర్ లైన్ విజన్‌ను నెరవేరుస్తానని, భారతీయ కస్టమర్లకు మరింత చేరువ చేస్తానని తెలిపారు. ఎల్బర్స్‌కి ఉన్న గ్లోబల్ ఎక్స్‌పీరియెన్స్ ఇండిగో అంతర్జాతీయ విస్తరణ ప్రణాళికలకు సాయం చేయనుంది.

Also Read : బంగ్లాదేశ్, పాకిస్తాన్‌ల కంటే మన దగ్గరే ఈ ధరలు మంట.. రీసెర్చ్ రిపోర్టు

Also Read : సీనియర్లకు గుడ్‌న్యూస్.. ఈసారి వేతన పెంపులు భారీగానే..!

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.