ఇలా చేస్తే ఐటీ ఉద్యోగాలకు ఢోకా లేదు: నారాయణమూర్తి

భారత ఐటీ రంగం పటిష్టత కోసం ఇన్ఫోసిస్ సహ- వ్యవస్థాపకులు ఎన్‌.ఆర్‌.నారాయణ మూర్తి పలు సూచనలు చేశారు. ఐటీకి గడ్డు రోజులు ఎదుర‌ుకావడంపై ఆయ‌న ఓ ఇంట‌ర్వ్యూలో మాట్లాడుతూ ప్రస్తుతం ఈ పరిస్థితులను చూసి కంగారుపడాల్సిన అవ‌స‌రం లేద‌ని వ్యాఖ్యానించారు. ఈ ప‌రిస్థితులు అధిగ‌మించ‌డానికి సీనియర్ల వేతనాల్లో కోత విధించి, ఉద్యోగులకు నైపుణ్యాల్లో శిక్షణ ఇవ్వాల‌ని తెలిపారు. ఉద్యోగుల తొలగింపుపై మాత్రం మానవీయ కోణంలో ఆలోచించాల‌ని పేర్కొన్నారు. ఏ సంస్థలో ఉద్యోగులు ఆనందంగా ఉంటారో అదే స్థిరమైన కార్పొరేట్‌ వ్యవస్థని పేర్కొన్నారు.

ఐటీ కంపెనీల యజమాన్యాలు తమ పెట్టుబడిదారి విధానాల్లో కొంత పట్టువిడుపు ధోరణితో ఉండాల‌ని నారాయణ మూర్తి సూచించారు. ఇలాంటి గడ్డు పరిస్థితులను ఎదుర్కోవడం దేశీయ‌ ఐటీ పరిశ్రమకు ఇదేమీ కొత్తేమీ కాదని అన్నారు. సంస్థ‌ల్లోని సీనియర్లు చిన్న చిన్న మార్పులకు ఒప్పుకోవాల‌ని, యువత ఉద్యోగాలకు ఎలాంటి ఢోకా లేదని ఆయ‌న తెలియజేశారు. డాట్‌కామ్‌ సంక్షోభం సమయంలో తాము కూడా ఇలాంటి చర్యలనే అనుసరించిన‌ట్లు మూర్తి తెలిపారు.

అంతేకానీ ఉద్యోగులను భయపెట్టడం ఏమాత్రం మంచి ప‌ద్ధ‌తికాద‌ని అన్నారు. యువతను సుశిక్షితులను చేయాల‌ని చెప్పారు. యాజమాన్యాలు కొత్త అవకాశాలను గుర్తించి, శిక్షణ కార్యక్రమాలను ఏర్పాటు చేయాలని, యువకులకు నైపుణ్యాలు, సాంకేతికతను అభ్యసించడానికి సమయం ఇవ్వాలని సూచనలు చేశారు.