రైల్వే టికెట్లు:ఒక ఐడీ మీద నెలకు ఆరే

రైలు టికెట్ల బుకింగ్ సంబంధించి ఐఆర్‌సీటీసీ కీల‌క మార్పులు చేసింది. ఈ కొత్త నిబంధనల ప్రకారం ఒక వినియోగదారుడు ఒక ఐడీ మీద నెలకు ఆరు టికెట్లు మాత్రమే బుక్‌ చేసుకోవచ్చు. ఆధార్‌ వెరిఫై చేసి ఉంటే నెలకు 12 టికెట్ల వరకు బుక్‌ చేసుకునే వీలుంటుంది. ప్రయాణ తేదీకి 120 రోజుల ముందుగానే ఈ టికెట్లు బుక్‌ చేసుకునే సదుపాయాన్ని కల్పించింది. ఇకపై ఐఆర్‌సీటీసీలో లాగిన్‌ అయి నిదానంగా టికెట్‌ బుక్‌ చేయడం కుదరదు. ఎందుకంటే.. రైళ్లలో ఖాళీలు చూసుకొని.. టికెట్‌ బుక్‌ చేసుకోవడానికి కేవలం 25 సెకన్ల సమయం మాత్రమే ఉంటుంది. పేమెంట్‌ చేయడానికి మరో ఐదు సెకన్ల సమయం మాత్రమే ఉంటుంది.ఈలోగానే టికెట్‌ బుక్‌ చేసుకోవాల్సి ఉంటుంది.

టికెట్‌ బుకింగ్‌కు సంబంధించిన మరికొన్ని నిబంధనలు:

• ఏసీ అయితే ఉదయం 10 గంటలకు, స్లీపర్‌ క్లాస్‌ అయితే 11 గంటలకు తత్కాల్‌ బుకింగ్‌ ప్రారంభమవుతుంది. ఉదయం 10-12 గంటల మధ్యలో ఒక యూజర్‌ ఐడీపై రెండు టికెట్లు మాత్రమే పొందవచ్చు.
• ప్రత్యేక సమయాల్లో మాత్రం 2 స్టేషన్ల మధ్య దూరాన్ని బట్టి ఒక ఐడీ మీద 6 బెర్తులు/టికెట్లు తత్కాల్‌లో బుక్‌ చేసుకునే అవకాశం ఉంది.
• తిరుగు ప్రయాణం మినహాయించి ఒక సెషన్‌లో ఒక తత్కాల్‌ టికెట్‌ మాత్రమే బుక్‌ చేసుకోవచ్చు. ఉదయం 8 నుంచి మధ్యాహ్నం 12 గంటల వరకు క్విక్‌బుక్‌ సర్వీస్‌ అందుబాటులో ఉండదు.
• ఉదయం 8-8.30 గంటలు, ఉదయం 10-10.30గంటలు, ఉదయం 11-11.30గంటల మధ్య మాత్రమే ఏజెంట్లు టికెట్లు బుక్‌ చేయాలి. ఇక తత్కాల్‌ రిజర్వేషన్‌ ప్రారంభమైన 30 నిమిషాల వరకు వారికి బుకింగ్‌కు అనుమతి ఉండదు.