పురుషులు ఆ విషయం గుర్తించాలి: ఇవాంక

సాంకేతిక రంగం అభివృద్ధితో మహిళలు, మహిళా పారిశ్రామికవేత్తలకు అపార అవకాశాలు అందుబాటులోకి వచ్చాయని ఇవాంక ట్రంప్ అన్నారు. జీఈఎస్‌లో రెండో రోజైన బుధవారం (నవంబర్ 29) ‘మహిళా పారిశ్రామికవేత్తల నైపుణ్యాభివృద్ధి’ అంశంపై జరిగిన ప్లీనరీలో ఆమె పాల్గొన్నారు. ఈ చర్చ కార్యక్రమానికి మంత్రి కేటీఆర్‌ సమన్వయకర్తగా వ్యవహరించగా.. ఇవాంకతో పాటు బ్రిటన్‌ మాజీ ప్రధాని టోనీ బ్లెయిర్‌ సతీమణి చెర్రీ బ్లెయిర్‌, ఐసీఐసీఐ బ్యాంక్‌ ఎండీ చందా కొచ్చర్‌, డెల్‌ సీఈవో క్వింటోస్‌ పాల్గొన్నారు.

ఈ సందర్భంగా ఇవాంక మాట్లాడుతూ.. మహిళలు విభిన్న రంగాల్లో అద్భుతంగా రాణిస్తున్నారని తెలిపారు. వ్యాపారాల్లో మహిళల భాగస్వామ్యం ఎంతో అవసరమని గుర్తు చేశారు. నైపుణ్యాభివృద్ధికి శిక్షణ ఇవ్వడం ఎంతో ముఖ్యమని, అమెరికన్‌ వర్సిటీల్లో మహిళలకు సాంకేతిక విద్య అందించడంపై ఎక్కువ శ్రద్ధ పెట్టామని చెప్పారు. మహిళలకు ప్రధానంగా నమ్మకం, సామర్థ్యం, మూలధనం ఉండాలని చెప్పారు. మహిళలు తమతో ఏ విషయంలో తీసిపోరని పురుషులు గుర్తించాలని అన్నారు.

మహిళలు ఉద్యోగాలు చేస్తూ కుటుంబాలకు ఆర్థికంగా అండగా ఉంటున్నారని ఇవాంక అన్నారు. నూతన అవకాశాలను అందిపుచ్చుకునేందుకు మహిళలు సిద్ధంగా ఉండాలని పిలుపునిచ్చారు. నూతన ఆవిష్కరణలన్నీ ప్రైవేట్ రంగంలోనే వస్తున్నాయని.. ఏ రంగంలోనైనా సేవలు బాగుంటేనే ఆదరణ ఉంటుందని ఆమె అన్నారు. స్త్రీలు ఎదుర్కొనే సమస్యలను మహిళా కోణంలో చూడొద్దని సమాజంలో సగభాగమైన వారి సమస్యలను క్లిష్ట సమస్యలుగా భావించి పరిష్కరించాల్సిన అవసరం ఉందని పేర్కొన్నారు.