జాక్‌ మా రిటైర్మెంట్‌.. అంతలోనే ట్విస్ట్

చైనా ఇ-కామర్స్‌ దిగ్గజం అలీబాబా సహ వ్యవస్థాపకుడు, ఎగ్జిక్యూటివ్ చైర్మన్‌ జాక్‌ మా పదవీ విరమణ వార్తలపై ఆ సంస్థ స్పందించింది. ప్రపంచ కుబేరుల్లో ఒకరైన జాక్ మా రిటైర్మెంట్ ప్లాన్లలో ఉన్నమాట వాస్తవమేనని, అయితే వచ్చే ఏడాది ఆయన పుట్టినరోజైన సెప్టెంబర్ 10న బాధ్యతల తప్పుకోనున్నారని వెల్లడించింది. జాక్ మా అనంతరం సీఈవో డేనియల్ జాంగ్ చైర్మన్ బాధ్యతలు స్వీకరిస్తారని ఓ ప్రకటనలో పేర్కొంది. దీంతో జాక్ మా రిటైర్మెంట్‌పై నెలకొన్న సందేహాలకు తెరపడింది.

రిటైర్మెంట్ ప్రకటన చేసిన వెంటనే అలీబాబా సంస్థ అవసరాలరీత్యా జాక్ మా సేవలు మరికొంత కాలం అందించాలని కోరారు. దీంతో మనసు మార్చుకున్న జాక్ మా.. మరో ఏడాదిపాటు చైర్మన్‌గా సేవలందించేందుకు సిద్ధమన్నారు. తన తదుపరి డేనియల్ జాంగ్ చైర్మన్‌గా బాధ్యతలు స్వీకరిస్తారని చెప్పారు. తాను అలీబాబా బోర్డు డైరెక్టర్‌గా మరో రెండేళ్లపాటు కొనసాగుతానని ఓ లేఖ ద్వారా వివరించారు.

ప్రస్తుతం జాక్ మా వయసు 54 సంవత్సరాలు. కాగా, ఆలీబాబా సంస్థ బాధ్యతల నుంచి వైదొలగి ‘విద్య’ మీద ఫోకస్ చేయాలని అనుకుంటున్నట్టుగా జాక్ మా ఇటీవల చెప్పారు. విద్యారంగం అభ్యున్నతికి తన వంతు ప్రయత్నం చేస్తానని ప్రకటించిన జాక్ మా.. తన రిటైర్మెంట్ ఒక యుగానికి అంతం కాదు అని, మరో యుగానికి ఆరంభం అని వ్యాఖ్యానించారు. దాంతో జాక్ మా రిటైర్మెంట్ ఖాయయని రెండు రోజుల కిందట ప్రచారం జరిగింది. ఈ నేపథ్యంలో జాక్ మా రిటైర్మెంట్ విషయంపై స్పందించిన అలీబాబా సంస్థ.. వచ్చే సెప్టెంబర్ 10 వరకూ సంస్థకు ఆయన సేవలు అందిస్తారని ప్రకటించింది.