జియో ఎఫెక్ట్: ఎయిర్‌టెల్ ప్లాన్‌లో మార్పు!

రిలయన్స్ జియో రాకతో దేశీయ టెలిఫోన్ రంగంలో నెలకొంటున్న తీవ్ర పోటీ నేపథ్యంలో టెల్కోలు సరికొత్త ప్లాన్‌లను వినియోగదారులకు అందిస్తున్నాయి. జియో ఆఫర్లకు కౌంటర్ ఇవ్వడంలో ఎప్పుడూ ముందుండే ఎయిర్‌టెల్ మరోసారి ఆ దిశగా సాగుతోంది. గతనెలలో 'రిపబ్లిక్ డే' ఆఫర్‌లో భాగంగా రిలయన్స్ జియో ప్రవేశపెట్టిన రూ.98 రీచార్జ్ ప్లాన్‌ను దీటుగా ఎదుర్కొనేందుకు భారతీ ఎయిర్‌టెల్ తన రూ.93 రీచార్జ్ ప్లాన్‌లో మార్పులు చేసింది.

జియో రూ.98 ప్లాన్‌ కింద 28 రోజుల కాలపరిమితితో 2 జీబీ డేటాను అందిస్తోంది. ఎయిర్ కూడా రూ.93 ప్లాన్‌‌లో 10 రోజులుగా ఉన్న కాలపరిమితిని 28 రోజులకు పెంచింది. అపరిమిత కాల్స్, ఉచిత రోమింగ్, రోజుకు 100 ఎస్సెమ్మెస్‌లు, 28 రోజుల కాలపరిమితితో 1 జీబీ 3జీ లేదా 4జీ డేటా అందిస్తోంది.

ఈ ప్లాన్ కింద అపరిమిత కాల్స్ పరిధి రోజుకు 250 నిమిషాలు, వారానికి 1000 నిమిషాలకు మించకూడదు. రోజువారీ కాల్స్ పరిమితి దాటిపోతే నిమిషానికి పది పైసలు చెల్లించాలి. వినియోగదారులు వారం రోజుల వ్యవధిలో వంద నంబర్లకు మించి కాల్ చేస్తే మిగతా కాలవ్యవధి మొత్తం నిమిషానికి పది పైసలు చెల్లించాల్సి ఉంటుంది.