జూన్ నెల‌లో త‌యారీ రంగం జోష్

ఇటు దేశీయంగాను, అటు విదేశాల నుంచి ఆర్డర్ల రాకతో జూన్‌లో తయారీ రంగం ఊపందుకుంది. తయారీ రంగ కార్యకలాపాల వృద్ధిని నమోదు చేసే నిక్కీ ఇండియా మాన్యుఫ్యాక్చరింగ్‌ పర్చేజింగ్‌ మేనేజర్స్‌ సూచీ (పీఎంఐ) 53.1 పాయింట్లకు చేరడం దీనికి నిదర్శనం. మేలో ఇది 51.2గా ఉంది. గతేడాది డిసెంబర్‌ తర్వాత ఇంత వేగవంతమైన వృద్ధి నమోదు కావడం ఇదే ప్రథమం.

అలాగే, వరుసగా 11వ నెలలోనూ తయారీ రంగ పీఎంఐ కీలకమైన 50 పాయింట్లకు ఎగువన కొనసాగడం గమనార్హం. సాధారణంగా పీఎంఐ 50 పాయింట్లకు ఎగువన ఉంటే వృద్ధిని, అంతకన్నా త‌క్కువ‌గా ఉంటే మందగమనాన్ని సూచిస్తుంది. భారీ ఆర్డర్లు, డిమాండ్‌ నెలకొన్న నేపథ్యంలో ఉత్పత్తి గణనీయంగా మెరుగుపడిందని నివేదికను రూపొందించిన ఆర్థికవేత్త ఆష్నా దోధియా తెలిపారు. జూన్ నెల ఇన్ పుట్ ఖ‌ర్చుల స‌బ్ ఇండెక్స్ 58.6శాతంగా ఉంటూ నాలుగు సంవ‌త్స‌రాల గ‌రిష్టాన్ని న‌మోదు చేసింది. ఇది మే నెల‌లో 54.7%గా ఉంది.