ఎల‌క్ట్రిక్ వాహ‌నాల‌పై లైఫ్ ట్యాక్స్ మిన‌హాయింపు

ఎలక్ట్రిక్‌ వాహనాలపై జీవితకాల పన్ను(లైఫ్‌ టాక్స్‌)కు మినహాయింపును ఇవ్వాలని ఏపీ కలెక్టర్ల సదస్సు నిర్ణయించింది. ఈ తరహా వాహనాలను ప్రోత్సహించేలా రూపొందించిన విధానాన్ని త్వరలో జరగనున్న కేబినెట్‌ సమావేశంలో ఆమోదిస్తామని సీఎం చంద్రబాబు స్పష్టం చేశారు. రాష్ట్రంలో ప్రయోగాత్మకంగా గత ఫిబ్రవరి నెలాఖరులో విశాఖలో ఎలక్ట్రిక్‌ కార్లను ప్రారంభించామని, లైఫ్‌టైమ్‌ ట్యాక్స్‌ మినహాయింపును ఇస్తే 15వేల వాహనాలను తక్షణమే సరఫరా చేసేందుకు తయారీ సంస్థ సిద్ధంగా ఉందని ఇంధనశాఖ కార్యదర్శి అజయ్‌జైన్‌ వివరించారు. సంప్రదాయ ద్వి, త్రిచక్ర వాహనాలనూ ఎలక్ట్రిక్‌ వాహనాలుగా మార్చే వీలుందేమో ఆరా తీయాలని అజయ్‌జైన్‌ను సీఎం సూచించారు.

ప్రస్తుతం చెత్త సేకరణ కోసం వినియోగిస్తున్న ఎలక్ర్టిక్‌ వాహనాలు బాగా పని చేస్తున్నాయని ఉభయ గోదావరి జిల్లాల కలెక్టర్లు కాటంనేని భాస్కర్‌, కార్తికేయ మిశ్రా వివరించారు. వంద చార్జింగ్‌ స్టేషన్లు ఏర్పాటు చేసేందుకు సిద్ధంగా ఉన్నామని, కలెక్టర్లు కోరితే ఆయ జిల్లాల్లో అవసరమైన మేరకు వాటిని ఏర్పాటు చేస్తామని ట్రాన్స్‌కో సీఎండీ కె.విజయానంద్‌ చెప్పారు. చార్జింగ్‌ పాయింట్లు విస్తృతంగా ఏర్పాటు చేయాలని ఆయన్ను సీఎం ఆదేశించారు.