బాస్ బెదిరిస్తే.. మగాళ్లు జాబ్‌కు టాటా చెప్పినట్లే..

ఆఫీస్‌లో ఎవరైనా సరిగా పని చేయకపోతే.. బాసులు హెచ్చరించడం మాములే. కాకపోతే వారు వార్నింగ్ ఇవ్వడాలు.. బెదిరింపులకు దిగడాలనేవి ఆడవాళ్లకు ఓకేగానీ.. మగాళ్లను బెదిరిస్తే అసలుకే మోసం వస్తుందట. బాసు బెదిరిస్తే ఆడవాళ్లు కోపంతో సిక్ లీవ్‌లు పెడుతుండగా.. మగవారు మాత్రం ఉద్యోగానికి టాటా చెప్పేస్తున్నారట. ఈ విషయం ఓ సర్వేలో వెల్లడైంది. ఆఫీస్‌లో మగ ఉద్యోగులను బెదిరిస్తే.. వారేమీ సెలవులు పెట్టరట, నిజంగానే అనారోగ్యంగా ఉన్నా ఆఫీసుకు వస్తారట. ఇది సర్వే చేపట్టిన వారిని ఆశ్చర్యానికి గురి చేసింది. కానీ టైం చూసుకొని ఝలక్ ఇస్తారట. బెదిరింపుల ప్రభావం మగవారి ఎదుగుదలపై ప్రభావం చూపుతుందట. వారి వేతన పెంపు, ప్రమోషన్ల మీద కూడా దీని ప్రభావం ఉంటుందని స్కూల్ ఆఫ్ బిజినెస్ అండ్ సోషల్ సైన్సెస్‌లో అసిస్టెంట్ ప్రొఫెసర్‌గా పని చేస్తోన్న ఎరిక్సన్ తెలిపారు. ఇందుకోసం వారు ప్రభుత్వ, ప్రైవేట్ రంగాల్లో పనిచేస్తోన్న 3 వేల మందిపై సర్వే నిర్వహించారు.

సరిగా పని చేయట్లేదని బాసు గానీ, తోటి ఉద్యోగులు గానీ విమర్శించడం కూడా ఉద్యోగుల పనితీరును దెబ్బతీస్తోందట. అయితే కేవలం బాసు గట్టిగా మందలించినందుకే మగవారు ఎందుకు ఉద్యోగాలు మానేస్తున్నారనేది మాత్రం ఎవరికీ అర్థం కావడం లేదు. ఈ విషయంలో ఆడవాళ్లే తెలివైన వాళ్లేమో.. ఏం చక్కా ఒంట్లో బాగోలేదని చెప్పి సెలవులు పెట్టి.. మళ్లీ బాసు కోపం తగ్గాక ఆఫీస్‌కు వస్తున్నారు. ఏదేమైనా.. మగవారితో కొంచెం జాగ్రత్తగా ఉండాలి. బాస్ ఏ మాత్రం మాట తూలినా ఆ జాబ్‌కు గుడ్ బై చెబుతారు.