భారత్‌లో బెంజ్ రికార్డు అమ్మకాలు

జర్మనీకి చెందిన లగ్జరీ కార్ల తయారీ కంపెనీ మెర్సిడెస్ బెంజ్ భారత్‌లో దూసుకుపోతోంది. మునుపెన్నడూ లేని విధంగా భారత్‌లో తమ కార్ల అమ్మకాలను పెంచేసింది. భారత్‌లో ఓ త్రైమాసికంలో 3,650 కార్లను విక్రయించడం ఇదే తొలిసారని మంగళవారం కంపెనీ వెల్లడించింది. ఈ ఏడాది జనవరి-మార్చి త్రైమాసికంలో తమ అమ్మకాలు ఇంత బాగా పెరగడానికి కొత్త ఇ-క్లాస్ సెడాన్, జీఎల్‌సీ క్లాస్ ఎస్‌యూవీలే కారణమని కంపెనీ వివరించింది.

గతేడాది ఇదే త్రైమాసికంలో 3,622 కార్లను విక్రయించిన మెర్సిడెస్ బెంజ్ ఈ సంవత్సరం ఆ సంఖ్యను 3,650కి చేర్చింది. 2016లో మొత్తం 13,231 కార్లను భారత్‌లో విక్రయించింది. అయితే 2015తో పోలిస్తే ఇది 1.8 శాతం తక్కువ. అయితే ఈ ఏడాది తమ కంపెనీ వృద్ధి వేగం పుంజుకుందని, తొలి త్రైమాసికం ఫలితాలు ఆశాజనకంగా ఉన్నాయని మెర్సిడెజ్ బెంజ్ ఇండియా మేనేజింగ్ డైరెక్టర్, సీఈవో రోలాండ్ ఫోల్గర్ వెల్లడించారు.

ఈ ఏడాది ఫిబ్రవరిలో విడుదలచేసిన ఇ-క్లాస్ సెడాన్ మోడల్ ఈ త్రైమాసికంలో ఎక్కువగా అమ్ముడుపోయిందని చెప్పారు. కేవలం ఆరు రోజుల్లోనే 500 ఇ-క్లాస్ కార్లను విక్రయించామన్నారు. అదే సమయంలో ఎస్‌యూవీ విభాగంలో కూడా 13 శాతం వృద్ధి సాధించమని తెలిపారు. దీనికి కారణం కొత్త జీఎల్‌సీ క్లాస్ ఎస్‌యూవీ అని చెప్పారు. మరో ఏడాది కాలంలో టైర్ 2, టైర్ 3 సిటీలకు మెర్సిడెస్ బెంజ్ సేవలను విస్తరిస్తామని ఫోల్గర్ స్పష్టం చేశారు.