మనీ ట్రాన్స్‌ఫర్లపై ‘మొబిక్విక్’ 0% ఆఫర్

మొబైల్ వాలెట్ సేవల్లో ఉన్న ‘మొబిక్విక్’ వినియోగదారుల కోసం కొత్త ఆఫర్‌ను తీసుకొచ్చింది. మొబిక్విక్ వాలెట్ నుంచి ఏదైనా బ్యాంక్ అకౌంట్‌కు డబ్బును బదిలీ చేసుకుంటే ఎలాంటి ఫీజు ఉండదని ప్రకటించింది. కేంద్ర ప్రభుత్వం రూ. 500, రూ. 1000 నోట్లను రద్దు చేసిన నేపథ్యంలో తాము ఈ నిర్ణయం తీసుకున్నామని కంపెనీ వెల్లడించింది.

గతంలో మొబిక్విక్ వాలెట్ నుంచి బ్యాంకు అకౌంట్‌కు మనీ ట్రాన్స్‌ఫర్ చేసుకుంటే సాధారణ వినియోగదారులకు 4 శాతం ఫీజుగా వసూలు చేసేవారు. అదే కేవైసీ సమర్పించిన యూజర్లకైతే 1 శాతం ఫీజు ఉండేది. ఇప్పుడు ఈ ఫీజు మొత్తాన్ని మొబిక్విక్ ఎత్తేసింది. కంపెనీ తీసుకున్న ఈ నిర్ణయంతో మొబిక్విక్ ఇప్పటికే 18 శాతం వృద్ధిని సాధించింది. మొబిక్విక్‌కి ప్రధాన పోటీదారు అయిన పేటీఎం కూడా ఇటీవల తన వినియోగదారులకు ఇలాంటి ఆఫర్‌నే ప్రకటించింది.

పేటీఎం నుంచి ఏదైనా బ్యాంక్ అకౌంట్‌కు మనీ ట్రాన్స్‌ఫర్ చేసుకుంటే 1 శాతం ఫీజుగా చెల్లించాల్సి ఉంటుంది. అత్యల్పంగా రూ. 100 పేటీఎం వాలెట్ నుంచి బ్యాంక్ అకౌంట్‌కు ట్రాన్స్‌ఫర్ చేసుకోవచ్చు. దీనిపై 1 శాతం ఫీజు మీ వాలెట్ నుంచి డెబిట్ అవుతుంది.