ఆధునిక హంగులతో హ్యుందాయ్ ఐ20

హ్యుందాయ్ మోటార్స్ సంస్థ బుధవారం సరికొత్త ఐ20 మోడల్‌ను లాంచ్ చేసింది. పాత వెర్షన్‌కు మరిన్ని మెరుగులు దిద్ది, ఆధునిక ఫీచర్లతో నూతన మోడల్‌ను రూపొందించింది. పెట్రోల్ వేరియంట్ ఎలైట్ ఐ20 ప్రారంభ ధర రూ. 5.35 లక్షలు ఉండనుంది. టాప్ మోడల్ ధర రూ. 7.91 లక్షలని కంపెనీ తెలిపింది. డీజిల్ వేరియంట్ ధర రూ. 6.73 లక్షల నుంచి రూ.9.16 లక్షల వరకూ ఉంటుందని వెల్లడించింది. సరికొత్త బ్లాక్ కాస్‌కేడింగ్ గ్రిల్, రీడిజైన్ చేసిన హెడ్‌ల్యాంప్, పగటి పూట కూడా వెలిగే ఎల్‌ఈడీలతోపాటు బంపర్లను కూడా కొత్తగా డిజైన్ చేశారు.

సరికొత్తగా రూపొందించిన డోర్లు, అలాయ్ వీల్స్ వల్ల కారు లుక్ మరింత ఆకర్షణీయంగా ఉండనుంది. కారు వెనుక భాగం కొద్దిగా మారనుంది. పాత మోడల్ కంటే ఇంటీరియర్ కూడా ఆధునికంగా ఉండనుంది. ఇందులో ఇన్‌బిల్ట్ నావిగేషన్‌, కనెక్టివిని సపోర్ట్ చేసే టచ్ స్క్రీన్ కన్సోల్ ఫీచర్ ఉండనుంది. ఇది అండ్రాయిడ్ ఆటో, ఆపిల్ కార్‌ప్లే తరహాలో ఉంటుంది.

కొత్త హ్యుందాయ్ ఐ20లోనూ ఫైవ్ స్పీడ్ మాన్యువల్ ట్రాన్స్‌మిషన్‌తో 1.2 లీటర్ పెట్రోల్ ఇంజిన్, సిక్స్ స్పీడ్ మాన్యువల్ ట్రాన్స్‌‌మిషన్‌తో 1.4 లీటర్ డీజిల్ ఇంజిన్ ఉండనుంది. ప్రమాద సమయంలో రక్షణగా నిలవడానికి ఆరు ఎయిర్ బ్యాగ్స్‌ను ఏర్పాటు చేశారు. ఇప్పటికే ఈ కారు బుకింగ్స్ ప్రారంభం అయ్యాయి.