బంగారం కొనుగోళ్లపై బాంబు పేల్చనున్న కేంద్రం?

బంగారం కొనుగోలుదార్లకు ప్రభుత్వం మరోసారి షాకివ్వనున్నట్లు తెలుస్తోంది. రూ. 50 వేలు దాటిన ఆభరణాల కొనుగోళ్లకు పాన్ తప్పనిసరి అనే నిబంధనను శుక్రవారమే ఎత్తేసిన ప్రభుత్వం తాజాగా ఓ షాకిచ్చింది. పాన్ తప్పనిసరనే నిబంధన తొలగించడం ద్వారా కొనుగోళ్లు ఊపందుకుంటాయని ఆభరణాల వ్యాపారులు భావించారు. కానీ బంగారం, ఇతర ఖరీదైన లోహాల కొనుగోళ్లపై ఊరట తాత్కాలికమేనని తేలింది. బంగారం కొనుగోళ్లపై కొత్త పరిమితిని విధించనున్నట్లు తెలుస్తోంది. బులియన్ మార్కెట్లోకి నల్లధనం మళ్లకుండా ఉండేందుకు ఈ నిర్ణయం తీసుకుంటున్నట్లు రెవెన్యూ శాఖ కార్యదర్శి హస్ముఖ్ అదియా తెలిపారు.

‘పాన్ తప్పనిసరి అనే నిబంధన బంగారం కొనుగోళ్లపై ప్రభావం చూపింది. దీంతో ఆభరణాల వ్యాపారులు ఈ నిబంధన తొలగించాలని ప్రభుత్వాన్ని కోరారు. కానీ బ్యాంకు డిపాజిట్లు, ఇన్సూరెన్సుల తరహాలోనే మనీలాండరింగ్ చట్టం ప్రకారం అధిక విలువైన ఆభరణాల కొనుగోళ్లు కూడా ప్రభుత్వం దృష్టికి రావాలి’ అని అదియా తెలిపారు. ఈ విషయమై అధ్యయనం చేస్తాం. కొత్తగా ఎంత పరిమితి విధించాలనే విషయమై నిర్ణయం తీసుకుంటామని ఆయన చెప్పారు. పసిడి వ్యాపార వర్గాలతో మాట్లాడిన తర్వాత ఓ నిర్ణయానికి వస్తామన్నారు.