ఆర్బీఐ నిబంధనలతో ఎం-వ్యాలెట్లు బెంబేలు!

ప్రభుత్వం పెద్ద నోట్లను రద్దుచేసిన తరవాత మొబైల్ వ్యాలెట్లు ఊపందుకున్నాయి. పేటీఎం, ఫ్రీచార్జ్ లాంటి మొబైల్ వ్యాలెట్ల వినియోగం విపరీతంగా పెరిగింది. ముఖ్యంగా డీమానిటైజేషన్‌తో పేటీఎం బాగా లాభపడింది. అయితే తాజాగా ఈ మొబైల్ వ్యాలెట్లపై రిజర్వ్ బ్యాంక్ ఆఫ్ ఇండియా దృష్టిపెట్టింది. ఈ మేరకు ప్రీపెయిడ్ పేమెంట్ ఇన్‌స్ట్రుమెంట్ (పీపీఐ) లైసెన్స్ హోల్డర్లకు ఇప్పటికే ఆర్బీఐ మార్గదర్శకాలు సూచించింది. వీటిలో నో యువర్ కస్టమర్ (కేవైసీ) సహా పలు నిబంధనలను ఆర్బీఐ చేర్చింది. అయితే ఈ నిబంధనలపై ఎం-వ్యాలెట్ సంస్థలు ఆందోళన వ్యక్తం చేస్తున్నాయి.

గతవారం సమావేశమైన పీపీఐలు ఆర్బీఐ నిబంధనలపై చర్చించారు. కేవైసీని అమలు చేయడం వల్ల చిన్న లావాదేవీలు నిలిచిపోతాయని మొబైల్ వ్యాలెట్ ఎగ్జిక్యూటివ్‌లు ఆందోళన వ్యక్తం చేశారు. ఈ విషయంపై పేమెంట్ కౌన్సిల్ ఆఫ్ ఇండియా, ఇంటర్నెట్ అండ్ మొబైల్ అసోసియేషన్ ఆఫ్ ఇండియా (ఐఏఎంఏఐ) సంయుక్తంగా ఆర్బీఐకి ఓ మెయిల్ కూడా పంపాయి. అయినా ఆర్బీఐ నుంచి ఎలాంటి స్పందన రాలేదు. దీంతో ఎం-వ్యాలెట్ సంస్థలు బెంబేలెత్తిపోతున్నాయి.

ప్రస్తుతం, ఈ-వ్యాలెట్లతో పాటు ఇతర ప్రీపెయిడ్ పేమెంట్ ఇన్‌స్ట్రుమెంట్స్ యూజర్ సాధారణ వివరాలతోనే రూ. 20వేల వరకు లావాదేవీలకు అనుమతిస్తున్నాయి. లావాదేవీలు రూ. 20వేలకు మించితే పూర్తి కేవైసీని సమర్పించాల్సి ఉంటుంది. ఆర్బీఐ కొత్త మార్గదర్శకాల ప్రకారం ఇప్పుడు ఎవరైనా పీపీఐలలో లావాదేవీలు జరపాలంటే కేవైసీని కచ్చితంగా సమర్పించాలి. కొత్తగా పీపీఐ లైసెన్సు తీసుకొనే సంస్థలు కూడా 60 రోజుల లోపల కేవైసీని సమర్పించాల్సి ఉంటుంది.

ఇప్పటికే పీపీఐ లైసెన్స్ పొందిన వ్యాలెట్లు తమ కస్టమర్లకు సంబంధించిన ఫుల్ కేవైసీని జూన్ 30 లోగా ఆర్బీఐకి అందజేయాలి. ఒకవేళ అలా చేయకుంటే కేవైసీ ఇవ్వని కస్టమర్ల లావాదేవీలకు ఆర్బీఐ అనుమతించదు. అయితే దీనిపై పీపీఐలు ఆందోళన చెందాల్సిన అవసరం లేదని పరిశ్రమ వర్గాలు అంటున్నాయి. టెలీకాం కంపెనీలు ఆధార్ లింకింగ్ ద్వారా కస్టమర్ పూర్తి వివరాలు సేకరిస్తున్నాయని, ఇదే పద్ధతిని ఎం-వ్యాలెట్లు అనుసరించొచ్చని పరిశీలికలు చెబుతున్నారు.