కొత్త యమహా ఎఫ్‌జెడ్ఎస్-ఎఫ్ఐ విడుదల

యమహా పాపులర్ బైక్ ఎఫ్‌జెడ్ సిరీస్‌కు 10 ఏళ్లు పూర్తయిన సందర్భంగా ఈ సిరీస్‌లో కొత్త బైక్‌ను కంపెనీ తీసుకొచ్చింది. వెనుక 220 మి.మీ. డిస్క్ బ్రేక్‌తో కొత్త ఎఫ్‌జెడ్ఎస్-ఎఫ్ఐ మోటార్ సైకిల్‌ను ఇండియా యమహా మోటార్ శుక్రవారం ఢిల్లీలో విడుదల చేసింది. ఈ కొత్త మోడల్ ధరను రూ.86,042 (ఎక్స్ షోరూం, ఢిల్లీ)గా కంపెనీ నిర్ణయించింది. ఇది వెనుక డ్రమ్ బ్రేక్‌తో వచ్చే మోడల్ ధర. వెనుక డిస్క్ బ్రేక్‌ కావాలనుకుంటే అదనంగా రూ.3వేలు చెల్లించాల్సి ఉంటుంది.

ఈ కొత్త ఎఫ్‌జెడ్ మోడల్‌లో యమహా కొద్దిపాటు మార్పుచేర్పులు చేసింది. కొత్త స్పోర్టియర్ ఎల్లాయ్ వీల్స్, రేర్ వ్యూ మిర్రర్స్ ఆకర్షణీయంగా ఉన్నాయి. ఈ కొత్త వర్షన్ కొత్త ‘ఆర్మడా బ్లూ’ రంగులో లభించనుంది. దీనికితోడు కొత్త ఆటోగ్రాఫిక్స్ ఆకట్టుకుంటున్నాయి. అంతకు మించి పెద్దగా మార్పులు ఏమీ చేయలేదు. పాత ఎఫ్‌జెడ్ బైకులో ఉన్నట్లే.. ముందు 282 మి.మీ. డిస్క్ బ్రేక్, 41 మి.మీ. ఫ్రంట్ ఫోర్క్స్, వెనుక మోనోషాక్ సస్పెన్షన్, వెడల్పైన 140 సెక్షన్ టైర్ ఫీచర్లే దీనిలోనూ ఉన్నాయి.

యమహా బ్లూకోర్ టెక్నాలజీతో 149 సీసీ, ఎయిర్ కూల్డ్ ఇంజిన్‌నే ఈ కొత్త ఎఫ్‌జెడ్ఎస్-ఎఫ్ఐలో వాడారు. ఈ టెక్నాలజీ ఇంజిన్‌ను కూల్‌గా ఉంచడమే కాకుండా ఇంధన దహన సామర్థ్యాన్ని బాగా పెంచుతుంది. దీని వల్ల బైక్ మంచి ఫ్యూయల్ ఎకానమీని ఇస్తుంది. ఫైవ్ స్పీడ్ గేర్‌బాక్స్‌తో కూడిన ఈ ఇంజిన్ 12.8 ఎన్ఎమ్ టార్క్ వద్ద 13.2 పీఎస్ పవర్‌ను విడుదల చేస్తుంది.