ఓలాకు మంచి రోజులు: భవిష్‌ అగర్వాల్‌

దేశంలో ప్రముఖ క్యాబ్‌ సర్వీసుల దిగ్గజ సంస్థ ఓలా తమ సమీప పోటీ దారును ఉబర్‌ను అధిగమించి వృద్ధి పథంలో దూసుకుపోతున్నట్టుగా ప్రకటించింది. భారత్‌లో నిలదొక్కుకొనేందుకు ఎంతో కష్టనష్టాలకు నిలబడుతూ ముందుకు సాగిన తమకు మంచి రోజులు ప్రారంభమైనట్టుగా ఆ సంస్థ సీఈవో భవిష్‌ అగర్వాల్‌ తెలిపారు. తన సంస్థ ప్రస్తుత లాభాలను ఆర్జించే స్థాయికి చేరిందని ఆయన వివరించారు. గడ్డు పరిస్థితులను నుంచి తేరుకొని తాము ప్రస్తుతం భారత్‌లో అందిస్తోన్న ప్రతీ సవారీపై లాభం ఆర్జిస్తున్నట్టుగా ఆయన వివరించారు.

గత రెండేళ్లుగా భారత్‌లో తమ మార్కెట్‌ వాటాను పెంచుకోవడం, సుస్థిరమైన వ్యాపార సామ్రాజ్యాన్ని ఏర్పాటు చేయడంపైనే ఎక్కువగా దృష్టి సారిస్తూ వచ్చినట్టుగా ఆయన వివరించారు. అయితే లాభాల్లోకి మళ్లిన వెంటనే తాము మరింత మూలధనం కోసం ప్రజల్లోకి వెళ్లాలని తాము భావించడం లేదని అగర్వాల్‌ వివరించారు. ఇనీషియల్‌ పబ్లిక్‌ ఆఫర్‌కు వెళ్లాలన్న భావన తమ సంస్థకు ఉన్నప్పటికీ మూడు-నాలుగేళ్ల తర్వాతే తాము పబ్లిక్‌ ఇష్యూకు వెళ్లనున్నట్టుగా ఆయన వివరించారు. సంస్థ ప్రారంభం నుంచి ఉన్న ప్రమోటర్లు కొందరు సంస్థ నుంచి పెట్టుబడులు ఉపసంహరించుకోవాలని యోచిస్తున్న వేళ భవిష్‌ ఈ ప్రకటన చేయడం విశేషం. సంస్థలో కొత్త ప్రమోటర్లుగా చేరేందుకు గాను సింగపూర్‌కు చెందిన టెమాసెక్‌ హోల్డింగ్‌ సంస్థ ఓలాలో దాదాపు 3 కోట్ల డాలర్ల పెట్టుబుడులు పెట్ట‌నుంది. దీని కోసం 3 కోట్ల డాల‌ర్ల‌కు సమానమైన‌ షేర్ల‌ను సంస్థ పూర్వ వ్యవస్థాపక సభ్యులు, ఉద్యోగుల నుంచి విక్రయించినట్టుగా సమాచారం.