రుణం కావాలంటే.. పాస్‌పోర్ట్ వివరాలు ఇవ్వాల్సిందే!

నీరవ్ మోదీ, విజయ్ మాల్యాల ఎఫెక్ట్‌తో కేంద్రం అప్రమత్తమైంది. భారీ మొత్తంలో బ్యాంకుల దగ్గర్నుంచి రుణాలు తీసుకొని.. ఎగ్గొట్టి.. ఎంచక్కా విదేశాలకు చెక్కేయడం ఇక మీదట కుదరదు. రూ. 50 కోట్లకు పైగా రుణాలు తీసుకునేవారు తమ పాస్ట్‌పోర్ట్ వివరాలను బ్యాంకులకు అందిచడాన్ని తప్పనిసరి చేసింది. పాస్‌పోర్ట్ వివరాలు బ్యాంకుల దగ్గర ఉండటం వల్ల.. ఆర్థిక మోసాలకు పాల్పడినవారు దేశం విడిచి పారిపోకుండా అడ్డుకోవచ్చని ఆర్థిక శాఖ కార్యదర్శి రాజీవ్ కుమార్ ట్వీట్ చేశారు.

కొత్తగా రుణం కోసం దరఖాస్తు చేసే వారితోపాటు.. ఇప్పటికే రూ.50 కోట్లకు పైగా రుణం తీసుకున్న వారందరి నుంచి బ్యాంకులు పాస్‌పోర్ట్ వివరాలు సేకరించనున్నాయి. ఇంతకు ముందే రుణాలు పొందినవారు 45 రోజుల్లోగా తమ పాస్‌పోర్ట్ వివరాల్ని బ్యాంకులకు అందించాల్సి ఉంటుంది.

నీరవ్ మోదీ, ఆయన బంధువు మెహుల్ చోస్కీ పంజాబ్ నేషనల్ బ్యాంకుకు రూ. 12,700 కోట్ల మేర రుణాలు ఎగొట్టి విదేశాలకు పారిపోయారు. ఇలాంటి ఆర్థిక మోసగాళ్ల బారి నుంచి బ్యాంకులను కాపాడటం కోసం కేంద్ర కేబినెట్ ఫ్యుజిటివ్ ఎకనమిక్ అఫెండర్స్ బిల్లు (దేశం విడిచి పారిపోయిన ఆర్థిక మోసగాళ్ల బిల్లు)కు గతవారం ఆమోదం తెలిపింది. ఈ చట్టం ద్వారా దేశం విడిచి పారిపోయిన వ్యక్తుల ఆస్తులను విక్రయించి, బాకీలను రాబట్టుకోవడానికి బ్యాంకులకు అవకాశం లభిస్తుంది. రూ. 100 కోట్లకుపైబడిన రుణాలు ఎగ్గొట్టి విదేశాలకు పారిపోయిన వారికి కూడా ఇది వర్తిస్తుంది.