పేటీఎంపై పేపాల్ ‘ట్రేడ్‌మార్క్’ దాడి

మొబైల్ పేమెంట్స్ సర్వీస్ పేటీఎంపై అంతర్జాతీయ ఆర్థిక లావాదేవీల సంస్థ పేపాల్ కేసు పెట్టింది. తమ కంపెనీ ట్రేడ్‌మార్క్‌ను పేటీఎం కాపీ చేసిందని పేపాల్ ఆరోపిస్తోంది. పేటీఎం ట్రేడ్‌మార్క్ ఇంచుమించుగా తమ ట్రేడ్‌మార్క్‌ను పోలి ఉందని పేపాల్ అంటోంది. ఈ రెండు సంస్థల ట్రేడ్‌మార్క్ (లోగో)లోనూ మొదటి మూడు అక్షరాలు ముదురు నీలిరంగులోను, తరవాత అక్షరాలు లేత నీలిరంగులో ఉంటాయి. మరోవైపు రెండు సంస్థల పేర్లు ‘PAY’తోనే మొదలవుతాయి. దీని వల్ల తమ వినియోగదారులు గందరగోళానికి గురవుతున్నారని పేపాల్ ఆరోపిస్తోంది.

నోయిడా నుంచి పనిచేస్తున్న పేటీఎం కంపెనీ గత జులైలో కొత్త ట్రేడ్‌మార్క్‌ను రిజిస్టర్ చేయించింది. దీనితోనే మార్కెట్లో ప్రకటనలు కూడా మొదలుపెట్టింది. పేటీఎం కొత్త ట్రేడ్‌మార్క్‌ను తెచ్చినప్పటి నుంచి పేపాల్ అభ్యంతరం వ్యక్తం చేస్తూనే ఉంది. ఇప్పుడు తాజాగా పేటీఎంపై ట్రేడ్‌మార్క్ కాపీరైట్ కింద కేసు పెట్టింది. భారత ప్రభుత్వం పెద్ద నోట్లను రద్దుచేసిన తరవాత దేశంలో అత్యధికంగా లాభపడింది పేటీఎం అనే చెప్పాలి. ఈ ఏడాది పేటీఎం నిర్ణయించుకున్న టార్గెట్‌ను కూడా అది దాటిపోయింది. మరి ఇప్పుడు పేపాల్‌తో వచ్చిన చిక్కుల నుంచి ఎలా బయటపడుతుందో చూడాలి.