క్రెడిట్ కార్డు ఫీజుపై వెనక్కి తగ్గిన పేటీఎం

క్రెడిడ్ కార్డుతో వాలెట్‌లో నగదు జమచేస్తే 2 శాతం అదనపు ఫీజు వసూలు చేస్తామని ప్రకటించిన పేటీఎం ఆ నిర్ణయంపై వెనక్కి తగ్గింది. బుధ, గురువారాల్లో క్రెడిట్ కార్డుపై అదనపు ఫీజు వసూలు చేసిన పేటీఎం దాన్ని ఎత్తివేస్తున్నట్లు శుక్రవారం ప్రకటించింది. ఈ మేరకు సంస్థ అధికారిక బ్లాగులో వెల్లడించింది. వినియోగదారులకు మరింత సౌఖర్యవంతమైన సేవలు అందించేందుకే ఈ ఫీజును ఎత్తివేస్తున్నట్లు బ్లాగులో పేర్కొంది. నిజాయితీగా లావాదేవీల కోసం క్రెడిట్ కార్డును ఉపయోగిస్తున్న తమ వినియోగదారులకు తాము తీసుకున్న నిర్ణయం ఇబ్బందికరంగా మారిందని, అందుకనే దీనిపై వెనక్కి తగ్గినట్లు వివరించింది.

అయితే క్రెడిట్ కార్డులతో వ్యాలెట్‌లో మనీ యాడ్ చేసినప్పుడు 2 శాతం ఫీజు విధించడానికి కారణం మరొకటి ఉందట. వాస్తవానికి కొంత మంది వినియోగదారులు క్రెడిట్ కార్డుతో వాలెట్‌లో నగదు జమచేసి.. ఆ మొత్తాన్ని మళ్లీ తమ బ్యాంక్ ఖాతాకు ట్రాన్స్‌ఫర్ చేసుకుంటున్నారు. దీని వల్ల వారికి ఎలాంటి అదనపు భారం ఉండదు. అలాగే క్రెడిట్ కార్డు ద్వారా నగదు డ్రా చేసుకుంటే పడే అదనపు ఛార్జ్ భయం కూడా ఉండదు. అయితే కొంత మంది వినియోగదారులు ఈ విధంగా చేయడం వల్ల పేటీఎం ఖజానాకు గండి పడుతుంది. క్రెడిట్ కార్డుతో పేటీఎం వాలెట్‌లో మనీ జమ చేయడం వల్ల ఆ కార్డులను జారీ చేసిన ఆయా బ్యాంకులు పేటీఎం నుంచి అదనపు ఛార్జీని వసూలు చేస్తున్నాయి.

అందుకనే క్రెడిట్ కార్డు వినియోగంపై 2 శాతం అదనపు ఫీజును పేటీఎం మళ్లీ తెరపైకి తీసుకొచ్చింది. అయితే దీనిపై యూజర్ల నుంచి వ్యతిరేకత వస్తుందని భయపడిన పేటీఎం రెండు రోజుల్లోనే ఆ నిబంధనను ఎత్తివేసింది. అయితే క్రెడిట్ కార్డుల ద్వారా వాలెట్‌ను దుర్వినియోగం చేయకుండా కొత్త నిబంధనలను తీసుకురానున్నట్లు పేటీఎం బ్లాగులో వెల్లడించింది.