త్వరలో తగ్గనున్న పెట్రోల్, డీజిల్ ధరలు!

గత కొద్ది నెలలుగా పెరుగుతూ వచ్చిన ముడి చమురు ధరలు ఒక్కసారిగా తగ్గుముఖం పట్టాయి. దీంతో అంతర్జాతీయ మార్కెట్లో చమురు ధరలు నాలుగు నెలల కనిష్ఠానికి చేరుకున్నాయి. బ్యారెల్ క్రూడాయిల్ ధర నాలుగు నెలల కనిష్ఠానికి దిగజారి 50 డాలర్ల దిగువ ట్రేడ్ అవుతోంది. అమెరికాలో కొత్త చమురు క్షేత్రాల అన్వేషణ అంచనాలకు మించి అధికంగా ఉందనే వార్తలు ఇన్వెస్టర్ల సెంటిమెంట్‌ను దెబ్బతీశాయి.

అమెరికాలో ముడి చమురు నిల్వలు మరో 50 లక్షల బ్యారెళ్లు పెరిగినట్లు ఎనర్జీ ఇన్ఫర్మేషన్ అడ్మినిస్ట్రేషన్ ప్రకటించడంతో కొనుగోళ్లు మందగించాయని ఇంటర్ ఫాక్స్ ఎనర్జీ అనలిస్ట్ అభిషేక్ కుమార్ తెలిపారు. యూఎస్‌లో క్రూడాయిల్ వెలికితీత పెరుగుతున్నందున, పతనమవుతున్న ధరలను స్థిరీకరించాలంటే ఒపెక్ ఉత్పత్తిని తగ్గించుకోవాల్సి ఉందని అభిషేక్ అన్నారు. ప్రస్తుతం మే నెలలో డెలివరీ అయ్యే బ్యారల్ క్రూడాయిల్ ధర 49.71 డాలర్లుగా ఉంది. నవంబర్ 30 తర్వాత ముడి చమురు ధరలు ఇంత తక్కువకు చేరడం ఇదే తొలిసారి. ఈ ప్రభావం భారత క్రూడ్ బాస్కెట్ ధరపై ఉండటం వల్ల పెట్రోలు, డీజిల్ ధరలు స్వల్పంగా తగ్గే అవకాశాలున్నాయి.