అంత వెచ్చిస్తే గానీ.. నోటు కష్టాలు తీరవట!

నల్లధనం నియంత్రణకు ప్రభుత్వం తీసుకున్న నిర్ణయం వల్ల పెద్దలతోపాటు పేదలు సైతం కష్టాలు ఎదుర్కొంటున్నారు. వారి ఇబ్బందులను తీర్చాలంటే.. ప్రభుత్వం మరిన్ని కొత్త నోట్లను విడుదల చేస్తూనే ఉండాలి. మరి, రిజర్వు బ్యాంకు ఆఫ్ ఇండియా(RBI) ఇప్పటి వరకు ఎన్ని నోట్లను ముద్రించింది? ఎన్ని పాత నోట్లు జమా అవుతాయని భావిస్తోంది? కొత్త నోట్ల ముద్రణకు, పాత నోట్ల రద్దుకు ఎంత వెచ్చించాలి? ఇలా ఎన్నో సందేహాలున్నాయి. అయితే, ఆర్బీఐ, ఆర్థికవేత్తల అంచనాల ప్రకారం.. నోట్ల రద్దు వల్ల ప్రభుత్వంపై సుమారు 11వేల కోట్ల భారం పడనుంది. ఇప్పటి వరకు అందిన సమాచారం ప్రకారం.. కొత్త నోట్ల ముద్రణకు రూ.4,929 కోట్లు, రద్దయ్యే పాత నోట్ల భర్తీకి రూ.5,932 కోట్లు ఖర్చు కానున్నాయి. అంటే.. మొత్తం రూ.10,861 కోట్లు వెచ్చించాల్సి ఉంటుంది. తాజా డిమాండు ప్రకారం.. ఈ భారం ఇంకా పెరిగినా ఆశ్చర్య పోవక్కర్లేదు.

గమనిక: కింది ఇన్ఫో గ్రాఫిక్స్‌లో గ్రీన్ రంగు రూ.500, పింక్ రూ.2000, రెడ్ రూ.1000 సూచిస్తాయి.

ప్రస్తుతం మార్కెట్లో 32 వేల మిలియన్ల రూ.10 నోట్లు, 15వేల మిలియన్ల రూ.500, ఏడు వేల మిలియన్ల రూ.వెయ్యి నోట్లు సర్క్యులేట్ అవుతున్నాయి. 2012 సంవత్సరం నాటి లెక్కల ప్రకారం.. ఒక రూ.10 నోటు ముద్రణకు రూ.1 వ్యయం అయ్యేది. రూ.500, రూ.1000 నోట్లకు రూ.2.5, రూ.3.2 చొప్పున ఖర్చయ్యేది. అయితే, 2015-16 సంవత్సరానికి ఈ మొత్తం పెరిగి ఉండొచ్చని అంచనా. కానీ, రూ.1000 ముద్రణకు ఎంత వ్యయం అవుతుందో.. తాజాగా వచ్చిన రూ.2000 ఖరీదు కూడా అంతే ఉంటుందని నిపుణులు తెలుపుతున్నారు.