RBI Imposes Penalty: మరో సహకార బ్యాంక్‌పై RBI కొరడా.. SBI కంటే ఎక్కువ వడ్డీ ఇస్తుందనే కారణంతో..!

RBI Imposes Penalty: రిజర్వ్ బ్యాంక్ ఆఫ్ ఇండియా.. ది నాకోదర్ హిందూ అర్బన్ కోఆపరేటివ్ బ్యాంక్ లిమిటెడ్‌కు పెద్ద మొత్తంలో జరిమానా విధించింది. ఏకంగా రూ.3 లక్షలు ఫైన్ వేసింది. ఈ మేరకు మార్చి 6న స్పష్టం చేసింది RBI. ఇది బ్యాంక్ రెగ్యులేటరీ నిబంధనలో లోపాల కారణంగా విధించబడిందని, ఇది కస్టమర్లకు నేరుగా లావాదేవీలు, అగ్రిమెంట్లకు సంబంధించినది కాదని పేర్కొంది. 2021, జులై 26న ఈ బ్యాంక్ విడుదల చేసిన సూపర్‌వైజరీ యాక్షన్ ఫ్రేమ్‌వర్క్ (SAF) రివ్యూ రిపోర్ట్ ప్రకారం.. ఈ బ్యాంక్‌పై రిజర్వ్ బ్యాంక్ చర్యలు తీసుకుంది. అసలు కారణం ఏంటంటే.. దిగ్గజ స్టేట్ బ్యాంక్ ఆఫ్ ఇండియా వివిధ కాలవ్యవధుల ఫిక్స్‌డ్ డిపాజిట్లపై ఆఫర్ చేసిన దాని కంటే ఎక్కువగా ఈ బ్యాంక్ వడ్డీ రేట్లు అందించిందంట.

ఇదే విషయమై ఆ బ్యాంకుకు రిజర్వ్ బ్యాంక్ ఆఫ్ ఇండియా నోటీసులు అందజేసింది. తమ నిబంధనలు ఉల్లంఘించినట్లు తేటతెల్లం అవుతుందని, తమపై ఎందుకు జరిమానా విధించకూడదో చెప్పాలంటూ స్పష్టం చేసింది. ఇక దీనిపై బ్యాంకు కూడా రిప్లై ఇచ్చింది. దానికి సంతృప్తి చెందని కేంద్ర బ్యాంక్.. ఇక ఆ బ్యాంక్‌కు రూ.3 లక్షల మేర ఫైన్ వేసింది. భవిష్యత్తులో ఇలాంటివి పునరావృతం కాకూడదని హెచ్చరించింది.

ఇక ఇటీవలి కాలంలో బ్యాంకు మోసాలు పెద్ద ఎత్తున వెలుగులోకి వస్తున్న సంగతి తెలిసిందే. విజయ్ మాల్యా, నీరవ్ మోదీ, మెహుల్ చోక్సీ వంటి వారు బ్యాంకుల రుణాలు ఎగ్గొట్టి విదేశాలకు పారిపోయారు. ఇదే నేపథ్యంలో చాలా బ్యాంకుల్లో మొండిబకాయిలు పేరుకుపోయిన విషయం రిజర్వ్ బ్యాంక్ దృష్టికి వచ్చింది. చాలా బ్యాంకులు దివాలా తీసే స్థితిలో ఉన్నాయట. ఇదే క్రమంలో ఇలాంటి పలు బ్యాంకుల ట్రాన్సాక్షన్లపై RBI ఆంక్షలు విధిస్తూ వస్తోంది.

• Read Latest Business News and Telugu News