కస్టమర్లకు ఉచితంగానే జియో 4జీ ఫీచర్ ఫోన్!

టెలీకాం రంగంలో సంచలనాలకు మారుపేరుగా మారిన రిలయన్స్ జియో ఇప్పుడు మరో అద్భుతానికి తెరలేపింది. దేశంలో స్మార్ట్‌ఫోన్లను వాడలేకపోతున్న మొబైల్ యూజర్ల కోసం 4జీ వివోఎల్టీఈ ఫీచర్ ఫోన్‌ను తీసుకొచ్చింది. దీన్ని వినియోగదారులకు ఉచితంగానే అందిస్తామని రిలయన్స్ ఇండస్ట్రీస్ అధినేత ముఖేష్ అంబానీ ప్రకటించారు. కేవలం డాటాకు మాత్రమే డబ్బులు చెల్లించాలని, ఫోన్‌ను ఉచితంగా అందిస్తున్నామని ఆయన వెల్లడించారు. రిలయన్స్ ఇండస్ట్రీస్ స్థాపించి 40 ఏళ్లు పూర్తయిన సందర్భంగా ముంబైలో వార్షిక సర్వసభ్య సమావేశం(ఏజీఎం)ను నిర్వహించారు.

ఈ 40 ఏళ్లలో రిలయన్స్‌ ఇండస్ట్రీస్‌ సాధించిన ప్రగతిని ముఖేష్ అంబానీ వివరించారు. ఈ సందర్భంగా టెలీకాం రంగంలో రిలయన్స్ జియో సంచనాలు, వృద్ధిని అంబానీ ప్రస్తావించారు. అలాగే ఎప్పుడెప్పుడా అని ఎదురుచూస్తున్న 4జీ వివోఎల్టీఈ ఫీచర్ ఫోన్‌ను విడుదల చేశారు. రూ. 1500 డిపాజిట్ చేసి జియో ఫీచర్ ఫోన్‌ను కొనుగోలు చేయాలని, ఈ మొత్తాన్ని మూడేళ్ల తరవాత తిరిగి వినియోగదారుడికి చెల్లిస్తామని అంబానీ చెప్పారు. ఆగస్టు 15 నుంచి ఈ ఫోన్ అందుబాటులో ఉంటుందన్నారు. అయితే తొలుత దీని పనితనాన్ని క్షుణ్ణంగా పరిశీలించిన తరవాత వినియోగదారులకు అందిస్తామన్నారు.

ఆగస్టు 24 నుంచి ఈ ఫీచర్ ఫోన్ ప్రీ ఆర్డర్లు ప్రారంభమవుతాయని, సెప్టెంబర్ నుంచి వినియోగదారుల చేతుల్లోకి ఇవి వస్తాయని చెప్పారు. ఈ ఫోన్‌కు కూడా రకరకాల డాటా ప్యాక్‌లను జియో తీసుకొచ్చింది. ప్రస్తుతం జియో కస్టమర్లు వాడుతున్న ‘ధన్ ధనా ధన్’ ఆఫర్‌ను నెలకు రూ. 153కే ఫీచర్ ఫోన్ యూజర్లకు అందించనున్నారు. రూ. 153తో రీచార్జ్ చేసుకుంటే నెలరోజులపాటు అపరిమిత కాల్స్, ఎస్ఎంఎస్, రోజుకి 1జీబీ డాటా పొందొచ్చు. అలాగే చిన్న ప్యాక్‌లు కూడా ఉన్నాయి. ఇదే ఆఫర్ రెండు రోజులకు రూ. 24, వారం రోజులకు రూ. 54తో అందించనున్నారు. స్మార్ట్‌ఫోన్‌లో ఉండే సదుపాయలన్నీ ఈ ఫీచర్‌ ఫోన్‌లో ఉన్నాయని అంబానీ వెల్లడించారు.