జియో నుంచి మరో ఉచిత ఆఫర్!

మార్కెట్‌లోని ప్రవేశించడంతోనే సంచలనాలకు కేంద్ర బిందువుగా మారిన జియో ఉచిత ఆఫర్లతో వినియోగదారులను మరింత ఆకట్టుకోడానికి ప్రయత్నిస్తోంది. దీనికి అనుగుణంగా పలు ఆఫర్లతో ఆకట్టుకున్న రిలయన్స్ జియో మరో ఉచిత ఆఫర్‌ను ప్రకటించింది. ఒక్క పైసా ఛార్జ్ లేకుండా కాలర్ ట్యూన్స్‌ను పొందే అవకాశాన్ని తన వినియోగదారులకు కల్పించింది.

జియో ట్యూన్ సర్వీస్ ద్వారా కస్టమర్లు తమకు నచ్చిన కాలర్ ట్యూన్స్ ను సెట్ చేసుకోవచ్చని ఆ సంస్థ తెలిపింది. దీనికి సంబంధించిన ఆప్షన్ జియో మ్యూజిక్ యాప్ ఉంటుందని వెల్లడించింది. వాస్తవానికి ఈ కాలర్ ట్యూన్స్‌కు టెలికమ్ సంస్థలు నెలవారీ ఛార్జీలు వసూలు చేస్తాయి. కానీ, జియో మాత్రం వీటిని నెల రోజుల పాటు ఉచితంగా అందిస్తోంది.

రిలయన్స్ జియో తన ప్రైమ్ ప్లాన్ గడువు తేదిని పొడిగించిన విషయం విదితమే. దీని ప్రకారం ఏప్రిల్ 15 వరకు వినియోగదారులు జియో ప్రైమ్‌లో చేరొచ్చు. దీంతో పాటు సమ్మర్ ఆఫర్‌ను కూడా జియో ప్రారంభించింది. సమ్మర్ సర్‌ప్రైజ్ పేరుతో వచ్చిన ఈ ప్లాన్‌ ప్రైమ్‌లో చేరిన తర్వాత రూ. 303తో రీచార్జ్ చేసుకుంటే మూడు నెలలపాటు ‘హ్యాపీ న్యూ ఇయర్’ ప్లాన్‌లో ఉన్న అపరిమిత డాటా, వాయిస్ కాల్స్‌ను వాడుకోవచ్చు. అయితే రీచార్జ్ చేసిన రూ.303 టారిఫ్ జులై నుంచి వర్తిస్తుంది. అంటే ఈ మూడు నెలల కాలపరిమితి ముగిసిన తర్వాత జులై‌లోనూ ఎలాంటి రీచార్జ్ చేసుకోవాల్సిన అవసరం లేదు.

జియో ఆఫర్ల మీద ఆఫర్లు ప్రకటిస్తుంటే ఇతర టెలికమ్ సంస్థలకు ఏంచేయలో పాలుపోవడం లేదు. మార్కెట్‌లో తిరుగులేని ఆధిపత్యాన్ని చెలాయించిన ఎయిర్‌టెల్, ఐడియా లాంటి కంపెనీలు తమ వినియోగదారులు చేజారిపోకుండా ప్రయత్నాలు ముమ్మరం చేశాయి. జియోకు పోటీగా ఇవి కూడా కొన్ని ఆఫర్లు ప్రకటిస్తూ ఆకట్టుకునే ప్రయత్నం చేస్తున్నాయి.