జిల్ జిల్ జియో: మరో మూడు నెలలు ఉచితం!

అంతా అనుకున్నట్టే జరిగింది. రిలయన్స్ జియో తన ప్రైమ్ మెంబర్‌షిప్ ప్లాన్ ఆఖరి తేదీని పొడిగించింది. ఇప్పుడు వినియోగదారులు ఏప్రిల్ 15లోగా జియో ప్రైమ్‌లో చేరొచ్చు. దీనికి తోడు మరో కొత్త ఆఫర్‌ను జియో ప్రారంభించింది. ‘సమ్మర్ సర్‌ప్రైజ్’ పేరుతో వచ్చిన ఈ ప్లాన్‌ను ఎంజాయ్ చేయాలంటే మొదట రూ. 99 చెల్లించి ప్రైమ్‌లో చేరాలి. తరవాత రూ. 303తో రీచార్జ్ చేసుకుంటే మూడు నెలలపాటు ‘హ్యాపీ న్యూ ఇయర్’ ప్లాన్‌లో ఉన్న అపరిమిత డాటా, అపరిమిత వాయిస్ కాల్స్‌ను ఎంజాయ్ చేయొచ్చు. అయితే మీరు రీచార్జ్ చేసిన 303 టారిఫ్ జులై నుంచి వర్తిస్తుంది. అంటే ఈ మూడు నెలల ఉచిత ఆఫర్ అయిపోయిన తరవాత జులై నెలకు కూడా మీరు ఎలాంటి రీచార్జ్ చేసుకోవాల్సిన అవసరం లేదు.

మొత్తానికి ఇప్పుడు మీరు రూ. 99 + రూ. 303 రీచార్జ్‌తో ‘హ్యాపీ న్యూ ఇయర్’ ఆఫర్‌లో ఉన్న బెన్‌ఫిట్స్‌నే నాలుగు నెలలపాటు ఎంజాయ్ చేయొచ్చు. ‘జియో కొత్త ప్లాన్లను కొనుగోలు చేయడానికి ఆఖరి తేదీని పెంచాలని వినియోగదారులు కోరుకుంటున్నట్లు మాకు సమాచారం వచ్చింది. అందుకనే మార్చి 31తో ముగిసిపోయిన గడువును ఇప్పుడు ఏప్రిల్ 15 వరకు పెంచాం. ఉచిత సేవలను రుసుము చెల్లించి వాడుకునేలా చేసినపుడు యూజర్లకు ఎలాంటి అంతరాయం కలగకుండా ఉండాలని ఆఖరి తేదీని పెంచాం’ అని రిలయన్స్ జియో ఛైర్మన్ ముఖేశ్ అంబానీ మీడియాకు వెల్లడించారు.

నెల రోజుల్లోనే సుమారు 7.2 కోట్ల మంది జియో కస్టమర్లు ‘జియో ప్రైమ్’లో చేరినట్లు కంపెనీ వెల్లడించింది. టెలీకాం చరిత్రలో ఇదొక అద్భుతమని, ఇంత పెద్ద మొత్తంలో కస్టమర్లు ఉచితం నుంచి చెల్లింపు సేవల్లోకి మారడం తొలిసారని పేర్కొంది. కాగా, రూ. 99 చెల్లించి జియో ప్రైమ్‌లో చేరితే మరో 12 నెలల పాటు ‘హ్యాపీ న్యూ ఇయర్’ ప్లాన్‌ను వాడుకోవచ్చని గతంలో కంపెనీ వెల్లడించింది. అయితే దీనికి నెలకు రూ. 303 చెల్లించాలని నిబంధన పెట్టింది. అయితే మార్చి 31వ తేదీ లోపల జియో ప్రైమ్‌లో చేరిన వారికి మాత్రమే ఈ ఆఫర్ వర్తిస్తుందని స్పష్టం చేసింది. కానీ కంపెనీ ఊహించిన స్థాయిలో కస్టమర్లు జియో ప్రైమ్‌లో చేరకపోవడంతో ‘సమ్మర్ సర్‌ప్రైజ్’ పేరుతో మరో కొత్త ఆఫర్‌ను తీసుకొచ్చింది.