రహస్య పత్రాలు వెనక్కివ్వండి.. మిస్త్రీకి టాటా నోటీసులు

టాటా గ్రూప్‌కి సంబంధించిన గోప్య పత్రాలను మాజీ చైర్మన్ సైరస్ మిస్త్రీ బయటపెట్టారనే ఆరోపణల నడుమ టాటా సన్స్ గురువారం మరో అడుగు ముందుకేసింది. మిస్త్రీ దగ్గర ఉన్న కీలక గోప్య పత్రాలన్నింటినీ 48 గంటల్లోగా వెనక్కివ్వాలని టాటా గ్రూప్ ఆదేశించింది. ఈ మేరకు మిస్త్రీ లీగల్ నోటీసు కూడా పంపింది. గడిచిన మూడు రోజుల్లో టాటా గ్రూప్ నుంచి మిస్త్రీ అందుకున్న రెండో లీగల్ నోటీసు ఇది.

నిజానికి టాటా గ్రూప్‌ చైర్మన్‌ పదవి నుంచి ఉద్వాసనకు గురైన సైరస్‌ మిస్త్రీ.. టాటా సన్స్‌ని ఎలాగైనా ఇబ్బందులకు గురి చేయాలని ప్రయత్నిస్తున్నారు. ఇటీవల మిస్త్రీతో పాటు ఆయన ఇన్వెస్టెమెంట్ కంపెనీలైన సైరస్ ఇన్వెస్ట్‌మెంట్, స్టెర్లింగ్ ఇన్వెస్ట్‌మెంట్‌‌లు నేషనల్ కంపెనీ లా ట్రిబ్యునల్‌ను ఆశ్రయించాయి. ఆ సందర్భంగా పిటిషన్‌కు కొన్ని టాటా గ్రూప్ రహస్య డాక్యుమెంట్లను జత చేసినట్లు ఆరోపణలొచ్చాయి. దీనిపై వెంటనే స్పందించిన టాటా గ్రూప్ మంగళవారం లీగల్ నోటీసులు పంపింది.

కంపెనీకి చెందిన కీలకమైన కార్పొరేట్ డాక్యుమెంట్లను బహిరంగ పరచడం ద్వారా సమాచార గోప్యతను ఉల్లంఘించారంటూ మిస్త్రీపై టాటా గ్రూప్ మండిపడింది. వెంటనే ఈ పత్రాల వినియోగాన్ని ఆపేయాలని నోటీసులో పేర్కొంది. అయితే తాజాగా ఈరోజు ఆ పత్రాలన్నింటినీ వెనక్కివ్వాలని నోటీసులు పంపింది.