నేనెక్కడికీ పారిపోలేదు.. ఇది కుంభకోణం కాదు: రొటొమాక్ యజమాని

బ్యాంకులకు రూ.800 కోట్లు ఎగనామం పెట్టి విదేశాలకు పారిపోయానని వస్తున్న వార్తల్లో నిజం లేదని ప్రముఖ పెన్నుల కంపెనీ రొటొమాక్ యజమాని విక్రమ్ కొఠారి ప్రకటించారు. తాను ఇప్పటికీ సొంత పట్టణం కాన్పూర్‌లోనే ఉన్నానంటూ ఓ ప్రకటనను విడుదల చేశారు. పంజాబ్ నేషనల్ బ్యాంక్‌లో రూ.11 వేల కోట్ల భారీ కుంభకోణాన్ని మరువక ముందే మరో కుంభకోణం జరిగినట్లు వచ్చిన వార్త ప్రకంపనలు సృష్టించింది. మొత్తం ఐదు బ్యాంకుల్లో రూ.800 కోట్ల రుణాలు తీసుకొని తిరిగి చెల్లించలేదని, కాన్పూర్‌లో ఉన్న కొఠారి కార్యాలయం కొన్ని వారాలుగా మూతబడి ఉందని అధికారులు గుర్తించారు. దీంతో మరో భారీ కుంభకోణం బయటపడిందని అందరూ భావించారు.

అయితే ఈ ఊహాగానాలను ఖండిస్తూ విక్రమ్ కొఠారి ఆదివారం రాత్రి ఒక ప్రకటనను విడుదల చేశారు. ‘ముందు దీన్ని కుంభకోణం అని అనకండి. నేను దేశాన్ని విడిచి పారిపోలేదు. నేను ఇప్పటికీ కాన్పూర్‌లోనే ఉన్నాను. నా కంపెనీని బ్యాంకులు నిరర్ధక ఆస్తి (ఎన్‌పీఏ)గా ప్రకటించాయి. కానీ ఎగవేతదారు అని ప్రకటించలేదు. ఈ అంశంపై ఇప్పటికే నేషనల్ కంపెనీ లా ట్రిబ్యునల్ (ఎన్‌సీఎల్టీ)లో విచారణ జరుగుతోంది. నేను రుణాలు తీసుకున్నాను, వాటిని త్వరలోనే చెల్లిస్తాను’ అని కొఠారి తన ప్రకటనలో పేర్కొన్నారు.

అలహాబాద్‌ బ్యాంకు, బ్యాంక్‌ ఆఫ్‌ బరోడా, ఇండియన్‌ ఓవర్సీస్‌ బ్యాంకు, యూనియన్‌ బ్యాంక్‌ ఆఫ్‌ ఇండియాల్లో కొఠారి రూ.800 కోట్ల రుణాలు తీసుకున్నారు. కొఠారికి రుణాలు ఇచ్చేందుకు బ్యాంకులు నియమాలను ఉల్లంఘించినట్లు తెలుస్తోంది. యూనియన్‌ బ్యాంకు నుంచి రూ.485 కోట్లు, అలహాబాద్‌ నుంచి రూ.352 కోట్ల రుణాన్ని కొఠారి తీసుకున్నారు. అయితే ఆయన ఇప్పటివరకూ అసలును కానీ, వడ్డీని కానీ బ్యాంకులకు తిరిగి చెల్లించనట్లు సమాచారం. ఈ ఘనటపై ఇప్పటికే అలహాబాద్ బ్యాంక్ స్పందించింది. కొఠారి ఆస్తులను అమ్మని రుణాలను రికవరీ చేస్తామని తెలిపింది.