2017 స్విఫ్ట్ లుక్ అదిరిపోయింది!

మారుతీ సుజుకి స్విఫ్ట్.. చిన్న కార్ల మార్కెట్‌లో ఎలాంటి విప్లవం లేవనెత్తిందో అందరికీ తెలిసిందే. ప్రీమియం హ్యాచ్‌బ్యాక్ విభాగంలో స్విఫ్ట్ చేసిన బిజినెస్ ఇతర ఏ బ్రాండ్ కార్ చేయలేదనడం అతిశయోక్తి కాదు. 2004లో విడుదలైన ఫస్ట్ జనరేషన్ స్విఫ్ట్‌ 5.3 మిలియన్లకు పైగా అమ్ముడుపోయింది. తన క్యూట్ స్టైలింగ్, షార్ప్ హ్యాండ్లింగ్‌తో ఎంతో మంది ఫ్యాన్స్‌ని సొంతం చేసుకుంది ఈ బుల్లి కారు. ఆ తరవాత సంవత్సరానికో మోడల్ వచ్చినా పెద్దగా మార్పులేమీ చోటుచేసుకోలేదు.

అయితే 2017 స్విఫ్ట్ మాత్రం కొత్త లుక్‌తో, మరింత ఎక్కువ టెక్నాలజీతో దూసుకొస్తోంది. ఈ కొత్త కారు మొత్తం మూడు వేరియంట్లలో లభించనుంది. హైబ్రిడ్, టర్బో, నాచ్యురల్-ఆస్పిరేటెడ్ వర్షన్లలో వస్తున్న ఈ కొత్త స్విఫ్ట్ ఆర్‌ఎస్‌ను మార్చిలో జరగనున్న జెనీవా మోటార్ షోలో ప్రదర్శించనున్నారు. ఈ షో ద్వారా స్విఫ్ట్ ఆర్ఎస్‌‌కి సంబంధించి మరిన్ని విశేషాలు తెలుస్తాయి. ప్రస్తుతానికి ధర విషయంలో ఎలాంటి సమాచారం లేనప్పటికీ జనవరి 4 నుంచి ఈ కారు జపాన్‌లో అందుబాటులోకి రానున్నట్లు తెలుస్తోంది.