సహారా వ్యవహారంలో 'సెబీ' ఆదేశాలపై 'స్టే'..!

'సహారా మ్యూచువల్‌ ఫండ్' వ్యవహారంలో సెబీ (సెక్యూరిటీస్ & ఎక్స్ఛేంజ్ బోర్డ్ ఆఫ్ ఇండియా) గతవారం ఇచ్చిన ఆదేశాలపై శాట్‌ (సెక్యూరిటీస్‌ అప్పీలెట్‌ ట్రిబ్యునల్‌ ) స్టే ఇచ్చింది. తదుపరి విచారణను ఏప్రిల్ 26కు వాయిదావేసింది. సహారా మ్యూచువల్‌ఫండ్‌ పథకాలు నిలిపివేసి, చందాదారులకు నిధులు తిరిగి ఇచ్చేయాలంటూ సెబీ ఆదేశించిన సంగతి తెలిసిందే. అయితే ఈ వ్యవహారంపై సహారా మ్యూచువల్‌ ఫండ్‌ 'శాట్'ను ఆశ్రయించింది. దీంతో సెబీ ఆదేశాలపై శాట్ 'స్టే' జారీచేసింది.

సెబీ ఆదేశాల ప్రకారం ఒక్కటి మినహా, మిగిలిన మ్యూచువల్‌ఫండ్‌ పథకాలన్నింటినీ ఏప్రిల్ 21 నాటికి సహారా గ్రూప్‌ నిలిపివేయాల్సి ఉంది. అయితే కొత్త చందాదార్లను చేర్చుకోకుండా, జులై 27 వరకు 'సహారా ట్యాక్స్‌ గెయిన్‌ ఫండ్‌'ను కొనసాగించేందుకు మాత్రం అనుమతించింది. ఈ పథకాన్ని కూడా ఆగస్టు 27 నుంచి పూర్తిగా నిలిపేయాలని ఆదేశించింది. సెబీ ఆదేశాలపై 'శాట్‌'ను ఆశ్రయించిన యాజమాన్యం ఈ మేరకు స్టే తెచ్చుకుంది. స్టే జారీచేసిన ట్రిబ్యునల్‌ తదుపరి విచారణను ఏప్రిల్ 26కు వాయిదా వేసింది.