బీజేపీ గెలుపుతో దూసుకెళ్లిన స్టాక్ మార్కెట్లు

గుజరాత్ ఎన్నికల ఫలితాల్లో బీజేపీ కాస్త వెనుకంజ వేయడంతో సోమవారం తొలుత నష్టాల్లోకి వెళ్లి అనంతరం లాభాల్లో ముగిసిన స్టాక్ మార్కెట్లు మంగళవారం జోరు కొనసాగించాయి. కీలకమైన గుజరాత్, హిమాచల్ ప్రదేశ్ ఎన్నికల్లో కేంద్రంలో అధికారంలో ఉన్న బీజేపీ గెలుపొందడంతో స్టాక్ మార్కెట్లకు కొత్త కళ వచ్చింది. మదుపర్లు నమ్మకం ఉంచడంతో మంగళవారం సెన్సెక్స్ 235 పాయింట్ల లాభంతో 33,836 వద్ద ముగిసింది. నిఫ్టీ 74 పాయింట్లు లాభపడి 10,463 స్థాయిలో ముగిసింది.

మారుతీ సుజుకీ లైఫ్ టైం హై స్థాయికి చేరుకొని 9,985 పాయింట్ల వద్ద ముగియడం విశేషం. మారుతి 5.82 శాతం లాభాలను పొందగా.. ఇతర ఆటో స్టాక్‌లు హీరో మోటోకార్ప్ 4.51 శాతం, టాటా మోటార్స్ 3.56 శాతం, బజాజ్ ఆటో 2.8 శాతం లాభపడ్డాయి. రూపాయి కూడా బలపడి మధ్యాహ్నం సమయానికి డాలర్‌తో రూపాయి మారకం విలువ 64.02కు చేరింది.